Жуырда «Қызмет» мемлекеттік, банк мекемелері және қоғамдық қызмет көрсету қызметкерлерінің салалық кәсіподағы» қоғамдық бірлестігінің Абай облысы бойынша филиалының алғашқы есеп-беру сайлау конференциясы болып өтті.
Аталмыш конференцияға қоғамдық бірлестік төрағасы Мирболат Жақыпов, Абай облысының ішкі саясат басқармасы басшысының орынбасары Назерке Аққожина, Абай облысы бойынша мемлекеттік кірістер департаменті кәсіподақ ұйымының төрағасы Бауыржан Абдулхамитов қатысты.
Күн тәртібінде бекітілген жеті мәселе қарастырылды. Атап айтсақ, кәсіподақ бірлестігінің 2019-2024 жылдарда жасаған жұмысы бойынша есеп, тексеру комиссиясының есебі, кәсіподақтың Абай облысы бойынша филиалының төрағасын сайлау, тексеру комиссиясының мүшелерін және атқару комитеті мүшелерін сайлау қарастырылды.
Конференция барысында барлық шешімдер делегаттардың дауыс беруі арқылы қарастырылып, қаулы қабылданды. Айта кетер жайт, бұл орайда «Қызмет» мемлекеттік, банк мекемелері және қоғамдық қызмет көрсету қызметкерлерінің салалық кәсіподағы» қоғамдық бірлестігінің Абай облысы бойынша филиалы төрайымы болып осы қызметті атқарып келе жатқан Дариға Абайқызы қайтадан сайланды.
Ал, кәсіподақ филиалының жұмысы «қанағаттанарлық» деп танылды. Тексеру комиссиясы өз кезегінде Кәсіподақтың Абай облысы бойынша филиалының 2019 жылдан бері атқарып келе жатқан жұмысына оң баға беріп, қызмет барысында ешқандай заң бұзушылықтар болмағанын атап өтті.
Басқосу соңында кәсіподақ жұмысына белсене атсалысып жүрген кәсіподақ мүшелері арнайы төсбелгі және құрмет грамоталарымен марапатталды.
