Биылғы жылдың басынан өңірде сыбайлас жемқорлықтың алдын алу бойынша бірқатар жұмыстар атқарылды. Бұл туралы Қазақстан Республикасы Сыбайлас жемқорлыққа қарсы іс-қимыл агенттігінің Абай облысы бойынша департаменті басшысының бірінші орынбасары м.у.а. Нұржан Толыбеков мәлімдеді.
— Өңірде «Сыбайлас жемқорлыққа қарсы волонтерлік» жобасы белсенді жүзеге асырылуда. Оның аясында 23 проблемалық құрылыс нысанына қоғамдық бақылау жүргізілуде. Волонтерлер бюджет қаражатының мақсатты жұмсалуын қадағалап, құрылыс сапасын бақылауға атсалысуда. Жыл басынан бері 4 нысан мен 2 мектептің құрылысы аяқталуға жақын. Мемлекеттік сатып алулар саласында да ауқымды жұмыстар жүргізілді. Департамент қызметкерлері 80 млн теңгеден астам бюджет қаражатының тиімсіз жұмсалуына жол бермеді.
«Халықты уақытылы хабардар ету, олардың мәселелеріне назар аудару, қолданыстағы рәсімдерді түсінікті және анық түсіндіру — бұл сыбайлас жемқорлыққа қарсы мәдениетті қалыптастырудың бір бөлігі. Ағымдағы жылдың бірінші тоқсанында еңбек ұжымдарында, бизнес өкілдері мен жастар арасында 60-тан астам кездесулер өткізілді. Бұдан бөлек, мемлекеттік органдардың өкілдерінен, нотариустар мен адвокаттар секілді кәсіби заңгерлерден құрылған мобильді топпен 1 200 азаматқа құқықтық және консультативтік көмек көсретілді. Сондай-ақ, «Бизнеске жол» жобасы аясында 140-тан астам кәсіпкердің құқықтары қорғалды», – деді Нұржан Толыбеков.
Туризм саласына жүргізілген талдау нәтижесінде бірқатар сыбайлас жемқорлық тәуекелдері анықталған. Атап айтқанда, лицензиялау кезінде жалған мәлімет берген 2 туроператор анықталды, Алакөл жағалауында 5 жер телімінің заңсыз берілгені белгілі болды.
— Сонымен қатар, Абайдың Жидебай-Бөрілі мемлекеттік тарихи-мәдени және әдеби-мемориалдық музей-қорығының қызметінде кадр саясатының ашық еместігі мен мемлекеттік сатып алулардағы кемшіліктер байқалды.
Осыған сәйкес, сыбайлас жемқорлық фактілері туралы хабарлаған азаматтарға ақшалай сыйақы қарастырылған. Өткен жылы 6 адамға жалпы көлемі 1,5 млн теңге сыйақы төленді. Сонымен қатар, Департамент қазіргі уақытта Өңірлік картаны іске асыру шеңберінде «Семей-Водоканал» кәсіпорны қызметінде сыртқы талдау жүргізуде. Біз қоғаммен ашық диалог орнатуға және кез келген азаматтың сыбайлас жемқорлықтың алдын алуға үлес қосуына мүмкіндік беруге дайынбыз, – деп қорытындылады департамент өкілі.
