Ұлы Отан соғысындағы Жеңістің 80 жылдығына орай елімізде «80 алғыс сөз» атты патриоттық флешмоб бастау алды. Бүгін бұл игі бастамаға Абай облысы да қосылды. Акцияға қатысушылар ардагерлерге деген алғыстарын білдіріп, бейбіт өмірдің, бостандық пен ата-бабалар ерлігінің қадірін атап өткен бейнежолдаулар жазып, мәтіндік жазбалар жариялауда.
Флешмоб әлеуметтік желілерде #ҰлыЖеңіс, #ДеньПобеды, #80СловБлагодарности, #80летПобеде, #80АлғысСөз, #ЖеңісҮшінРақмет хештегтермен өтуде. Әр өңірде әлеуметтік желілерде фотосуреттер, бейнематериалдар мен жеке оқиғалармен бөлісілген жазбалар жариялануда. Ұйымдастырушылар әсіресе жастардың белсенділігін атап өтті.
Көкпекті ауданының белсенді жастар өкілі Назым Келербекова осы челленджге қатысып, өз ойымен бөлісті:
— Бүгін біз бейбіт елде, тәуелсіз мемлекетте, ашық аспан астында өмір сүріп отырсақ – бұл ең алдымен Сіздердің жанқияр ерліктеріңіздің, қажырлы еңбектеріңіздің, Отанға деген шексіз сүйіспеншіліктеріңіздің арқасы. Сұрапыл соғыс жылдарында Сіздер туған жер үшін, болашақ ұрпақ үшін кеуделеріңізді оққа тостыңыздар. Жас өмірлеріңізді құрбан етіп, ұрпақ амандығы үшін аянбай күрестіңіздер. Сіздердің майдандағы жауынгерлік ерліктеріңіз бен тылдағы жанкешті еңбектеріңіз – мәңгі ел есінде, – деп атап өтті.
Аягөз аудандық мәслихатының төрағасы Архат Ибрайшин әкесі туралы естелігімен бөлісті.
– Әкем – I дәрежелі «Ұлы Отан соғысы», III дәрежелі «Даңқ» ордендерінің, және көптеген медальдардың иегері. Бірақ мен үшін оның ең үлкен марапаты – ұрпағының құрметі, елі мен халқының ыстық ықыласы. Бүгінде ол арамызда болмаса да, оның ерлігі мен өнегесі – біздің жүрегімізде. Біз Әкемізбен әрдайым мақтанамыз, – деп жазды Архат Ибрайшин әлеуметтік желідегі парақшасында.
Аталған акция 15 сәуірде Шымкент пен Атырау облысында басталған болатын. 16 сәуірде челленджге Ақтөбе мен Қарағанды облыстары қосылды. Енді алғыс эстафетасы Түркістан облысы мен Абай өңіріне де жетті.
Ұйымдастырушылар облыс тұрғындарын игі іске атсалысып, ардагерлерге жүректен шыққан шынайы алғыс сөздерін жеткізуге шақырады.
