2025 жылдың сәуір айында Шәкәрім университетінің Жоғары бизнес мектебі базасында Семей қаласының мектеп оқушыларына арналған екі маңызды білім беру іс-шарасы – қаржылық сауаттылық пен экономика пәндерінен қалалық олимпиадалар өткізілді.
Іс-шаралардың негізгі мақсаты – жастар арасында қаржылық мәдениетті қалыптастыру, жеке қаржыны тиімді басқару дағдыларын дамыту, салық салу және нарықтық қатынастар жөнінде терең білім беру болды. Олимпиадаларға 9–11 сынып оқушылары қатысып, теориялық тапсырмалар, квиздер мен шағын жобалар арқылы өз білімдерін сынап көрді.
9 сәуір күні өткен қаржылық сауаттылық олимпиадасында оқушылар банк операциялары, салық жүйесі мен жеке бюджетті жоспарлау бойынша өз білімдерін көрсетті.
15 сәуірде ұйымдастырылған «Экономикалық білім – ең үздік капитал» атты сайыс бірнеше кезеңнен тұрды: командалық таныстыру, тест сұрақтары, экономикалық терминдер сайысы және жобаларды қорғау.
Олимпиада қорытындысы бойынша жеңімпаз командалар анықталып, барлық қатысушыларға дипломдар мен естелік сыйлықтар табысталды. Ерекше белсенділік танытқан оқу орындары қатарында №45, №50, №44 орта мектептері, №5 гимназия және №51 мектеп бар.
Мұндай білім сайыстары тек теориялық білімді арттырып қана қоймай, жастардың қаржылық жауапкершілігін қалыптастырып, болашаққа саналы көзқарас қалыптастыруына ықпал етеді. Бұл – Қазақстан Республикасының Президенті Қасым-Жомарт Тоқаевтың:
«Жастар өз қаржысын басқаруға бейімделіп, сауатты болуға тиіс. Бұл – болашақ инвестициясының басты кепілі» деген сөзімен толық үндеседі.
Шәкәрім университеті алдағы уақытта да мектеп оқушыларына арналған экономикалық және кәсіпкерлік бағыттағы іс-шараларды дәстүрлі түрде жалғастыруды көздеп отыр. Бұл – болашақ мамандарды даярлауға, жастардың кәсіби бағдарын анықтауға және елдің тұрақты экономикалық дамуына үлес қосатын маңызды бастама.
Улан Тлемисов, Shakarim University,
Бизнес жоғары мектебінің аға оқытушысы
