Курчатов қаласында бюджет, инвестиция және өнеркәсіп өндірісінің өсуі байқалуда
Абай облысының Өңірлік коммуникациялар қызметіндегі брифингте Курчатов қаласының әкімі Болат Әбдіралиев 2025 жылдың I тоқсанындағы негізгі әлеуметтік-экономикалық көрсеткіштер туралы мәлімдеді.
Оның айтуынша, қалалық бюджеттің кіріс бөлігі 55%-ға артық орындалып, бюджетке 832 миллион теңге түскен. 2024 жылдың қорытындысы бойынша артық орындалу 30%-ды құраған, бұл тұрақты оң динамиканы көрсетеді.
– Бұл көрсеткіштер қаланың тұрақты дамып келе жатқанын дәлелдейді. Курчатов өңірдің өнеркәсіптік және инвестициялық тартымды орталығы болып қала береді, – деді Әбдіралиев.
Негізгі капиталға салынған инвестиция көлемі 748 миллион теңгені құрап, өткен жылмен салыстырғанда екі есе артты. Өнеркәсіп өндірісінің көлемі 2,1 миллиард теңгеге жетті. Алдыңғы қатарлы кәсіпорындар қатарында – Ұлттық ядролық орталық, УМЗ, Azot, Мерусар және Altyn Group Qazaqstan.
Шағын және орта бизнес белсенді дамып келеді – қалада 588 субъект тіркелген. Жаңа жобалар қаралуда, оның ішінде көмір-химия кешенінің құрылысы да бар.
Әлеуметтік салада денсаулық сақтау нысандарын жаңғырту жалғасуда.
– Мамыр айында қалалық аурухананың 4-қабатындағы жөндеу жұмыстары аяқталады, ол жерде жаңа босану блогы мен операциялық зал ашылады. Бұл сапалы медициналық көмектің қолжетімділігін арттырады. Сондай-ақ, бос тұрған төрт қабатты ғимаратты аурухана қажеттілігі үшін қалпына келтіру мәселесі қаралуда, – деді әкім.
Аурухананың бірінші және екінші қабаттары жөнделген, апаттық-техникалық орталықтың құрылысы жүріп жатыр.
– Білім беру, спорт және бос уақытты тиімді өткізуге ерекше көңіл бөлінуде: Балалар мен жасөспірімдердің шығармашылық үйі ашылды, мектептерде жөндеу жұмыстары жүргізілуде, спорт алаңдары мен демалыс орындары салынуда. Біздің мақсатымыз – жастардың өмір сүру және даму үшін лайықты жағдай жасау, – деп атап өтті Әбдіралиев.
Сонымен қатар, абаттандыру, жол инфрақұрылымын қалпына келтіру, жылумен және сумен жабдықтау жүйелерін жаңғырту жұмыстары жүргізіледі. Әкім кадр тапшылығы мәселесіне де тоқталды — қалада 375 бос жұмыс орны бар, ал ресми тіркелген жұмыссыздар саны — 107 адам.
– Алдымызда нақты міндеттер тұр. Біз мамандарды тарту, өмір сапасын арттыру және қаланың тұрақты дамуы бағытында жұмысты жалғастырамыз, – деп түйіндеді Болат Әбдіралиев.
