Semeytany.kz – Ақсуат ауылында 300 орындық жаңа мектептің құрылысы басталды. Бұл – елді мекен тұрғындарының көптен күткен қуанышы. Абай облысының әкімі Берік Уәли жұмыс сапары барысында мектептің құрылыс алаңына барып, жергілікті ақсақалдармен бірге нысанның алдағы маңызына тоқталды.
Жаңа мектеп былтыр құрылысы басталып, кейін тоқтап қалған білім ордасының орнына салынады. Мектеп пайдалануға берілген соң Ақсуат ауылындағы оқушы орны тапшылығы біршама жеңілдейді. Қазіргі таңда аудан бойынша 3956 оқушы 19 мектепте білім алып жатыр. Аудан орталығындағы екі мектеп оқушыларды екі ауысыммен оқытуға мәжбүр.
Ақсақалдар атынан сөз алған ауыл тұрғыны Болат Оразғалиев үшінші мектептің салынатынына ризашылығын білдірді:
«Бұл мектептің салынуын көптен бері күтіп жүр едік. Оқушылардың қиналып жүргені рас. Ауылға қажет білім ордасы салынатынына қуаныштымыз», – деді ол.
Облыс әкімі Берік Уәли бұл шешім ауыл халқының ұсынысы негізінде қабылданғанын атап өтті:
«Ауыл халқының өтініш-тілегін орындап жатырмыз. Құтты болсын. Құрылыстың сапасын өздеріңіз де бақылап отырыңыздар», – деді аймақ басшысы.
Ақсуат ауылдық қоғамдастығының төрағасы Сәбит Жәлелбеков соңғы жылдары аудан орталығында жүзеге асып жатқан оң өзгерістерге тоқталды.
«Ақсуатымыз күннен күнге көркейіп келеді. Көшелеріміз төрт жолақты болып кеңейіп жатыр. Қаладан кем емес. Мемлекеттік Ту тұғыры орнатылды. Инвесторлар көмегімен бұрын-соңды болмаған жанар-жағармай бекеті де салынып жатыр. Мұның бәрі туған жерге деген жанашырлықтың белгісі», – деді ол.
Сонымен қатар облыс әкімі Екпін ауылындағы қабылдау үйінің ашылуына қатысып, апатты жағдайдағы мектептің орнына жаңа мектеп салынатынын және ауылда дене-шынықтыру сауықтыру кешені бой көтеретінін айтты.
Ақсуат ауылында үшінші мектептің салынуы – ауылдағы білім сапасын арттырумен қатар, елді мекеннің дамуына серпін беретін маңызды қадам. Бұл бастама ауыл жастарына сапалы білім алу мүмкіндігін кеңейтпек.
