Semeytany.kz – Абай облысының әкімі Берік Уәлидің төрағалығымен өткен кеңейтілген аппараттық кеңесте «Таза Қазақстан» республикалық экологиялық бағдарламасының өңірдегі іске асырылу барысы талқыланды. Жиынға облыстық табиғи ресурстар және табиғатты пайдалануды реттеу басқармасы басшысының орынбасары Асқар Тұмарбек қатысты.
Мемлекет басшысының бастамасымен қолға алынған «Таза Қазақстан» экологиялық бағдарламасы облыста сәтті жүзеге асырылуда. 2025 жылдың 5 сәуірінде басталған санитарлық-экологиялық екі айлыққа 227,3 мың адам, 10 275 ұйым және 4114 бірлік техника жұмылдырылған. Осы уақыт аралығында 39,3 мың тонна тұрмыстық қалдықтар шығарылып, 132,6 мың аула, 1939 саябақ пен гүлзар, 1193 ескерткіш тазартылып, 57 681 түп ағаш пен бұта отырғызылды.
Былтыр «Ғарыш Сапары» ғарыштық мониторингі арқылы облыс аумағында 200-ден астам рұқсат етілмеген қоқыс үйінділері анықталған. Басқарма өкілінің айтуынша, бұл мәселе әлі де өзекті болып қалып отыр.
Облыс әкімі экологиялық бағдарламаның екі айлық акциясы аяқталғанымен, тазалық жұмыстарының үздіксіз жүргізілетінін және бақылауда болатынын атап өтті. Қала мен аудан әкімдеріне аудан орталығымен ғана шектелмей, ауылдардың тазалығына да ерекше мән беру керектігі және егілген ағаштарға күтім жасау қажеттілігі тапсырылды.
– Тазалық – бәрімізге ортақ. Алайда тазаланған жерге қайтадан қоқыс тастап кететін адамдар бар. Мұндай жағдайларда заң аясында тиісті шара қолдану керек. Қала мен аудан әкімдері жергілікті полициямен және «Аманат» партиясымен бірлесе жұмыс істеуі қажет. Бейнекамералар санын көбейтіп, тұрғындарға ақпараттық түсіндіру жұмыстарын жүргізу өте маңызды, – деп қорытындылады облыс әкімі.
Бұл бастама өңірдің экологиялық ахуалын жақсартып, тұрғындардың таза әрі әдемі ортада өмір сүруіне жағдай жасауға бағытталған.
