Semeytany.kz – Ақордада Қазақстан Президенті Қасым-Жомарт Тоқаев пен Астанаға ресми сапармен келген Болгария Президенті Румен Радевтің ресми келіссөзі өтті. Кездесу екі ел арасындағы стратегиялық серіктестікті нығайтуға бағытталды.
Салтанатты қарсы алу рәсімі құрмет қарауылының рапорт беруімен басталды. Екі елдің мемлекеттік әнұрандары орындалып, мемлекет басшылары делегация мүшелерін таныстырды. Кейін келіссөздер шағын құрамда жалғасты.
Қасым-Жомарт Тоқаев өз сөзінде Болгарияны Еуропадағы маңызды серіктестердің бірі ретінде атап өтті. Ол екі ел арасындағы сауда, инвестиция, көлік және тау-кен өндірісі салаларындағы қарым-қатынастың тұрақты дамып келе жатқанын айтты.
«Біздің нарықта 60-қа жуық болгар компаниясы табысты жұмыс істеп жатыр. Қазіргі уақытта біз тау-кен өнеркәсібі, өндіріс, көлік және құрылыс салаларында жемісті ынтымақтастық орнаттық. Ал энергетика, логистика, жасыл технология, атом, цифрландыру және туризм бағытында да үлкен әлеует бар», – деді Мемлекет басшысы.
Болгария Президенті Румен Радев Қазақстан тарапына көрсетілген қонақжайлыққа ризашылығын білдіріп, екі ел арасындағы байланыстарды жандандыруға мүдделі екенін айтты.
«Біз Қазақстанды Орталық Азиядағы басты серіктесіміз деп санаймыз. Экономикалық өсім, жоғары технологиялар мен ғылымдағы табыстарыңыз таңғаларлық. Ғарыш орталығына жасаған сапарым үлкен әсер қалдырды», – деді ол.
Кездесу барысында тараптар туризм, денсаулық сақтау, ауыл шаруашылығы және білім беру салаларында да ынтымақтастықты тереңдетуге уағдаласты.
Бұл келіссөздер екіжақты қарым-қатынасты жаңа деңгейге көтеріп, Қазақстан мен Болгария арасындағы стратегиялық әріптестікті одан әрі нығайтуға серпін бермек.
