Semeytany.kz – Қазақстан Президенті Қасым-Жомарт Тоқаев Қытайды еліміздің тату көршісі және уақыт тезінен өткен сенімді стратегиялық серіктесі деп атады. Бұл туралы ол екі ел арасындағы ынтымақтастықтың қазіргі жай-күйіне байланысты мәлімдеді.
Мемлекет басшысы геосаяси тұрақсыздық пен халықаралық ахуалдың шиеленісуіне қарамастан, Қазақстан мен Қытай арасындағы қарым-қатынастың тұрақты сипатқа ие екенін атап өтті.
– Қытай Қазақстанмен арадағы ынтымақтастығында ешқандай саяси шарт қоймаған. Біздің егемендігіміз бен қауіпсіздігімізге көрсеткен қолдауды жоғары бағалаймыз. Қытайдың бейбіт бастамаларын қолдаймыз, әділ әлемдік тәртіп орнату әрекеттерін құптаймыз, – деді Президент.
Қасым-Жомарт Тоқаев екі елдің БҰҰ, ШЫҰ, АӨСШК, БРИКС+ және «Орталық Азия – Қытай» форматындағы халықаралық ұйымдар аясындағы ықпалдастығын ерекше атап өтті.
Қытай – Қазақстанның ең ірі сауда-экономикалық серіктесі. 2023 жылғы қорытынды бойынша, екі ел арасындағы сауда көлемі 44 миллиард долларға жетіп, рекордтық көрсеткішке қол жеткізілді.
Сондай-ақ Президент мәдени-гуманитарлық саладағы ынтымақтастыққа тоқталып, елдегі Конфуций орталықтары, Лу Бань шеберханалары мен Қытайдың жоғары оқу орындары филиалдарының маңызын атап өтті. 2025 жыл «Қазақстандағы Қытай туризмінің жылы» деп жарияланған.
Мемлекет басшысы атом энергетикасы саласына да ерекше тоқталды.
– Қазақстанда бірнеше, тым болмаса екі-үш АЭС салу жоспарлануда. Бұл бағытта ірі компанияларды тарту бойынша жұмыс жүріп жатыр. АЭС құрылысы бойынша Қытайдың CNNC компаниясын сенімді серіктес ретінде қарастырып отырмыз. Сонымен қатар Қазақстан Қытайға табиғи уран мен ядролық отын жеткізіп отырған сенімді ел, – деді Президент.
Осылайша, Қытаймен стратегиялық ынтымақтастық Қазақстанның энергетика, экономика, ғылым және мәдениет салаларында жаңа белестерге шығуына жол ашып отыр.
