Semeytany.kz – Бүгін облыс әкімі Берік Уәлидің төрағалығымен кеңейтілген аппараттық кеңес өтіп, 2025–2026 жылдардағы жылыту маусымына дайындық барысы талқыланды. Кеңеске облыстық басқарма басшылары мен аудан, қала әкімдері қатысты.
Жиында Энергетика және тұрғын үй-коммуналдық шаруашылық басқармасының басшысы Раджан Сейітқанов, Семей қаласы әкімінің міндетін атқарушы Бекжан Бапышев, Аягөз және Жарма аудандарының әкімдері баяндама жасады.
27 мамырда өткен Үкімет отырысында Премьер-Министр Олжас Бектенов жылу маусымына дайындықты 10 маусымға дейін өзектендіруді тапсырған болатын. Алайда бұл тапсырма бірқатар өңірлерде, оның ішінде Семей, Аягөз және Жарма аудандарында тиісті деңгейде орындалмаған. Осыған байланысты облыс әкімі бұл салаға жауапты тұлғалардың жауапкершілігін қарау туралы тапсырма берді.
Қазіргі таңда облыста орталықтандырылған жылумен қамтамасыз ететін 46 жылу қазандығы бар. Биыл 6,6 млрд теңге көлемінде қаржы бөлініп, 12 қазандықты жөндеу, 11,2 шақырым жылу желісін жаңарту жұмыстары жүргізіліп жатыр. Семейде алты учаскеде магистральдық және ішкі кварталдық желілер ауыстырылуда.
Аягөз қаласында 29 қазандық жұмыс істейді. Бұл қазандықтар 7 жылу көзіне біріктірілген. Халықтың 60 пайызын жылумен қамтитын «Орталық» қазандығын жаңарту жобасы дайындалған. Қуаты 13,2 Гкал-дан 30 Гкал-ға дейін артады деп жоспарланып отыр. Сонымен қатар қаладағы 10,4 шақырым жылу желісін жөндеу үшін жобалық құжаттар әзірленген.
Жарма ауданының Шуақ ауылында 3 қазандық бар. Қазіргі уақытта 2-қазандықты жөндеу қажеттілігі туындап отыр. Ауылдағы 5,2 шақырым жылу желісінің 68 пайызы тозған. Биыл соның 3 шақырымына күрделі жөндеу жүргізу үшін облыстық бюджеттен қаржы бөлінді.
Өңірдің көмірге қажеттілігі 1,2 миллион тонна. Бүгінде облыста 16 көмір сату орны және 32 көмір операторы жұмыс істеп тұр.
Облыс әкімі жөндеу жұмыстарын 15 қыркүйекке дейін толық аяқтауды тапсырды. Аягөз және Жарма аудандарының әкімдеріне аталған қазандықтар мен желілердің жағдайын тұрақты бақылауда ұстауды, ал басқарма мен облыс әкімінің орынбасарына тапсырмалардың уақтылы және сапалы орындалуын қадағалауды жүктеді.
– Жылыту маусымына толық дайын болу – өте маңызды міндет. Бұл мәселені Үкімет басшысы жеке бақылауда ұстап отыр. Алдағы үш айда барлық жұмысты сапалы орындап, бөлінген қаржыны тиімді игеруіміз қажет, – деді Берік Уәли.
Сонымен қатар, жылу маусымына дайындық барысын апта сайын баяндап отыру, ал ай сайын жиналыс өткізуді жұмыс кестесіне енгізу тапсырылды.
