Semeytany.kz – Ертең өтетін «Туған жерге туыңды тік» инвестициялық форумы қарсаңында Семей қаласының қоғамдық көлік жүйесі 44 заманауи автобуспен толықты. Бұл — соңғы жылдары алғаш рет жүзеге асырылып отырған ірі жаңарту. Бұған дейін қала автобус паркі 2019 жылдан бері жаңартылмаған болатын.
Қазіргі таңда Семейде 42 бағыт бойынша 331 автобус жолаушыларға қызмет көрсетеді. Қалада 5 тасымалдаушы компания жұмыс істейді.
Жаңадан әкелінген көліктердің ерекшелігі — олардың барлығы заманауи салқындатқыш жүйемен жабдықталған. Автобустар қалада құрастырылған. Бұл — жергілікті өндірісті қолдау мен тұрғындарға жайлы қызмет ұсынуға бағытталған нақты қадам.
Облыс әкімі Берік Уәли жаңа автобустардың таныстырылымына қатысып, көлік паркін жаңарту жұмыстарының жалғасатынын жеткізді:
– Бір ай бұрын Семейдің даму жоспары аясында автобус паркін жаңартамыз деген уәде берген едік. Енді сол уәде орындалып отыр. Қалаға 44 автобус жіберілмек: 30-ы – үлкен, 14-і – шағын автобустар. Барлығы өзіміздің Семейде шығарылған, сапалы әрі бәсекеге қабілетті. Бұл автобустарға өзге облыстардан да сұраныс түсіп жатыр. Бірақ зауыт алдымен туған жеріне қолдау көрсетіп отыр. Жыл соңына дейін бұл санды 70-ке жеткіземіз. Келесі жылы тағы 50 автобус сатып алу жоспарда бар. Қала тұрғындары енді алғаш рет салқындатқышы бар автобустармен жүретін болады, – деді аймақ басшысы.
Жаңа автобустардың сырты ұлы ақын Абай Құнанбайұлының 180 жылдық мерейтойына орай арнайы логотиппен безендірілген. Бұл — қала келбетіне ғана емес, ұлттық мерейтой рухына да үлес қосатын мәдени бастама.
Мақсат – тұрғындарға жайлы және сапалы қоғамдық көлік қызметін ұсыну.
