Semeytany.kz – Мемлекеттік қызметші күніне орай Семей қаласында ұйымдастырылған «Адал жол – таза жүрек» және «MARATHON-1424» атты бұқаралық марафонға шекарашылар белсене қатысып, жоғары нәтиже көрсетті.
Абай халықаралық әуежайы маңынан басталған марафонға қаладағы түрлі мемлекеттік мекемелерден 150-ге жуық қызметкер жиналды. Қатысушылар 5 және 10 шақырым қашықтыққа жүгіріп, ширақ қимыл мен төзімділіктің үлгісін паш етті.
Жарыста ҚР ҰҚК Шекара қызметінің Абай облысы бойынша департаментіне қарасты әскери қызметшілер де ерекше көзге түсті. Шекарашылар жоғары нәтижелер көрсетіп, жүлделі орындарға ие болды. Оларға дипломдар мен медальдар табысталды.
Марафонның ашылуында сөз сөйлеген Абай облысының әкімі Берік Уәли мұндай спорттық іс-шаралардың қоғамдағы тәртіп пен салауатты өмір салтын насихаттаудағы маңызы зор екенін атап өтті.
Айта кетейік, белгіленген уақытта мәреге жеткен 30 қатысушыға арнайы естелік медальдар тапсырылды. Ал шекарашылардың бұл белсенділігі – олардың тек шекара күзетінде ғана емес, азаматтық бастамаларда да алда жүргенін көрсетті.
