Semeytany.kz — Облыс әкімі Берік Уәли жұмыс сапары барысында Бородулиха колледжінің тыныс-тіршілігімен танысты. Ауыл шаруашылығы саласына маман даярлайтын оқу орны 2007 жылы құрылған, ал 2012 жылдан бастап өз жұмысын бастады. Қазір мұнда 167 студент білім алуда. Колледжде 52 қызметкер еңбек етеді, оның ішінде 16 педагог және 6 өндірістік оқыту шебері бар.
Оқу орны типтік емес 10 ғимараттан тұрады. Колледж аумағында 49 орындық жатақхана, 150 орындық асхана, медициналық пункт, кітапхана, оқу кабинеттері мен зертханалар, өндірістік шеберханалар орналасқан. Сонымен қатар техникаларға арналған гараждар мен бейнебақылау жүйесі бар, жылу жүйесі автономды.
Колледж «тамақтандыруды ұйымдастыру», «ауыл шаруашылығын механикаландыру», «дәнекерлеу ісі» және «орман шаруашылығы» мамандықтары бойынша кадр даярлайды. 16 кәсіпорынмен серіктестікте жұмыс істейтін оқу орнының түлектері толықтай жұмыспен қамтылып отыр.
Колледж ұжымы облыс әкімінен 1988 жылы салынған оқу корпусы мен әкімшілік ғимаратты жөндеуге және ескі су жүйесін жаңартуға көмек сұрады. Сонымен қатар жаңа жатақхана қажеттігін де жеткізді. Бұл ұсыныстарды тыңдаған аймақ басшысы колледждің аймақ үшін маңызын ерекше атап өтіп, қолдау көрсетілетінін айтты.
– Бүгінгі таңда еңбек нарығына сай білікті маман даярлау – басты міндеттердің бірі. Бородулиха колледжі ауыл шаруашылығы, әсіресе орман шаруашылығына қажетті мамандар дайындауда. Жатақхана ғимараты ескірген. Сондықтан жаңа жатақхана салуға тапсырма берілді. Қажетті құжаттар әзірленуі тиіс. Бұл оқу орнының материалдық-техникалық базасын жаңартуға бағытталған жұмыстар жүйелі жалғасады, – деді Берік Уәли.
