Semeytany.kz — Мемлекет басшысының бастамасымен құқықтық мәдениетті арттыру, құқықбұзушылықтардың алдын алу және қоғамдық тәртіпті нығайту мақсатында Абай облысында «Заң мен Тәртіп апталығы» өтуде.
Іс-шара аясында құқық қорғау органдары, заңгерлер, мемлекеттік мекемелер мен қоғамдық ұйым өкілдерінен құралған мобильді топтар өңірдің алыс елді мекендерін аралап, тұрғындарға заңгерлік кеңес беріп, құқықтық түсіндіру жұмыстарын жүргізуде.
Акция «Заңдылық керуені — қолжетімді заң көмегі» ұранымен ұйымдастырылып отыр. Мамандар азаматтарға тұрғын үй, әлеуметтік төлем, еңбек даулары және әкімшілік мәселелер бойынша түсініктеме беріп, арыз-өтініштер толтыруға көмектесті. Жасөспірімдер арасындағы құқықбұзушылықтардың алдын алу мен тұрмыстық зорлық-зомбылық тақырыптары да назардан тыс қалған жоқ.
Облыс прокуратурасы мұндай кең ауқымды акциялар халықтың құқықтық сауатын арттырып қана қоймай, құқық қорғау органдарына деген сенімді нығайтатынын атап өтті.
Айта кетейік, 24 маусым күні облыс прокуратурасы «Ашық есік күнін» өткізіп, тұрғындардың құқық қорғау мәселелеріне қатысты сұрақтарына жауап берді.
«Заң мен Тәртіп апталығы» апта соңына дейін жалғасады.
Абай облысы прокуратурасының сайтына сілтеме:
https://www.gov.kz/memleket/entities/prokuratura-abay/press/news/details/1024047?lang=kk
