Semeytany.kz – Абай облысында өңір басшысы Берік Уәлидің төрағалығымен өткен кеңейтілген кеңесте бірқатар маңызды мәселе көтерілді. Оның ішінде квазимемлекеттік сектордағы қаржылық ахуал мен ауылдық медициналық нысандардың құрылысы басты назарда болды.
Қаржы басқармасының басшысы Гүлфайрус Серікболова бірқатар мекемелердің қаржылық тұрақтылығына қатысты есеп берді. Теріс қаржылық нәтиже көрсеткен ұйымдарға даму жоспарын бекітіп, нақты іс-қимылдар жоспарын әзірлеу тапсырылды. Сонымен қатар, басқармаларға қарасты кәсіпорындардың алдағы бес жылға арналған қаржылық-шаруашылық жоспарларын жасап, мемлекеттік мүлік тізіліміндегі деректерді нақтылау міндеттелді.
Кеңесте «Ауылдық денсаулық сақтауды жаңғырту» ұлттық жобасы шеңберінде салынып жатқан медициналық нысандардың жай-күйі де қаралды. Денсаулық сақтау басқармасының басшысы Талғат Молдабековтің айтуынша, 2023-2025 жылдарға арналған жоба аясында облыста 65 нысан салынуы тиіс. Қазірге дейін 62-сі салынып біткенімен, тек 17-сі ғана пайдалануға берілген.
Облыс әкімі Құрылыс басқармасына нысандарды қабылдамас бұрын барлық кемшілікті жоюды, ал аудан әкімдеріне бұл істі қатаң бақылауға алуды тапсырды.
— Сапаға мән берілмей отыр. Бұған дейін де бақылау жүргізуді тапсырдым. Алайда инспекторлардың тексерісі нәтижесінде бірқатар ақаулардың түзелмегені анықталды. Сондықтан бұл жұмысты күшейту керек, — деді Берік Уәли.
Сонымен қатар, кеңесте мал қорымдарының жай-күйі сөз болды. Облыс әкімі «Таза Қазақстан» бағдарламасы аясындағы тазалық жұмыстарын жалғастырып, полицияға құзырлы органдармен бірлесіп тұрақты рейдтер жүргізуді тапсырды.
