Semeytany.kz – Абай облысының әкімі Берік Уәли Семей қаласындағы үлескерлер мәселесін сәуір айынан бастап жеке бақылауға алып, әрбір азаматтың құжатын мұқият қарау, әлеуметтік шиеленістің алдын алу жөнінде тапсырма берген болатын. Бүгін осы бағыттағы нақты қадам ретінде «Dala SK» ЖШС үлескерлерімен арнайы кездесу өтті.
Жаңа ұсыныс: дайын пәтер – әділ өтем
Кездесуге Абай облысының мемлекеттік сәулет-құрылыс бақылау басқармасы, Экономикалық тергеу департаменті, «Rain» құрылыс компаниясы өкілдері және үлескерлер қатысты. Жиын барысында «Rain» компаниясы мемлекет пен бизнестің серіктестігі аясында 65 үлескерге өздері салған қаржы көлеміне сәйкес Семейдегі Селевин көшесі, 35 мекенжайынан дайын пәтер ұсынды. Сонымен қатар бұл тұрғын үй кешеніне заңды инвестиция ретінде қатысуға мүмкіндік берілмек.
Құжаттар толық заңдастырылған
Мемлекеттік бақылау органдары «Rain» компаниясының құрылыс жүргізуге қажетті барлық рұқсаттары мен сараптамалары заңға сай екенін растады. Мемлекеттік сәулет-құрылыс бақылау басқармасының басшысы Сайлауғалы Байназаров бұл жобаға ешқандай ескерту жоқ екенін мәлімдеп, облыс әкімінің тапсырмасымен 65 үлескерді баспанамен қамтамасыз ету жөнінде шешім қабылданғанын жеткізді.
– Аймақ басшысы қарапайым халық зардап шекпеуі тиіс деген нақты ұстанымды алға қойып отыр, – деді басқарма жетекшісі.
Осылайша, үлескерлердің жылдар бойғы мәселесі шешілуге жақын. Жаңа тұрғын үй кешенінен берілетін пәтерлер олардың салған қаражатына сай бөлінетін болады.
