Semeytany.kz – Абай облысының әкімі Берік Уәли Семей қаласына жұмыс сапары аясында 1-ші жылу электр орталығына (ЖЭО-1) барып, қазандықтағы жөндеу жұмыстарының барысын тексерді. Жөндеу маусымы биыл маусым айында басталған.
Жөндеу жұмыстары кестеге сай жүруі тиіс
Қазіргі уақытта №4 сумен қыздырылатын қазандыққа экрандық құбырлар дайындалып, жабдықтарды бөлшектеу жұмыстары жүргізілуде. Жабдықтарды жеткізу бойынша барлық келісімшарттар жасалған. Бұл орталық қала бойынша 564 коммерциялық мекеме, 30 әлеуметтік нысан, 55 бюджеттік ұйым және 23 607 тұрғынды жылумен қамтамасыз етеді.
– Қаланың негізгі жылу көзі болғандықтан бүгін арнайы келіп, жұмыстардың барысын көзбен көруді жөн көрдім. Барлық жұмыс бекітілген кестеге сай орындалып, жылу маусымына дейін толық аяқталуы керек. Энергетика басқармасына күнделікті бақылауда ұстауды тапсырамын, – деді аймақ басшысы.
Жылу жүйесіне 6,6 миллиард теңге бөлінген
Қазіргі таңда Семейде 19 орталықтандырылған жылу қазандығы мен 1 жылу электр орталығы жұмыс істейді. Биыл барлық қаржы көздерінен 6,6 миллиард теңге бөлініп, 12 қазандыққа жөндеу жүргізу жоспарланған. Сонымен қатар, жылу желілерін жаңғырту бағытында 6 жоба қолға алынған.
Инфрақұрылым мен көлік ағыны да назарда
Сапар барысында облыс әкіміне Әуезов даңғылын ұзарту жобасы да таныстырылды. Бұл – бұрынғы ет комбинаты аумағындағы 1,5 шақырым жолды қалпына келтіріп, оны республикалық маңызы бар «Омбы–Майқапшағай» тас жолына қосу арқылы Титов көшесінің жүктемесін азайтуды көздейтін жоба. Сонымен қатар, бұл аумақта сауда орындары мен тұрғын үйлер салу арқылы инфрақұрылымды дамыту жоспарланып отыр.
Берік Уәли жауапты басқармаларға бұл жобаны жан-жақты саралап, нақты ұсыныстар енгізуді тапсырды.
