«Әділет» партиясында «Қуатты өңірлер – қуатты ел» атты стратегиялық сессия өтіп, онда сарапшылар, мемлекеттік органдар мен бизнес қауымдастығының өкілдері Қазақстан өңірлерін дамытуға қатысты өзекті мәселелерді талқылады.
Жиында аймақтар арасындағы әлеуметтік-экономикалық алшақтықты азайту, инвестиция тарту, тұрғын үй-коммуналдық шаруашылығын жаңғырту, ауылдық аумақтарды дамыту, сондай-ақ экология мен энергетика салаларын жетілдіру мәселелері сөз болды.
Сессия барысында «Әділет» партиясы Саяси кеңесі бюросының мүшесі Рауан Кенжеханұлы өңірлік саясаттың тиімділігі тек экономикалық көрсеткіштермен ғана емес, халықтың өмір сүру сапасына тигізетін нақты әсерімен бағалануы тиіс екенін айтты.
Оның сөзінше, өңірлердің даму деңгейін инвестиция көлемі немесе жүзеге асқан жобалар саны арқылы ғана емес, әрбір қала, аудан мен ауыл тұрғындарының тұрмыс сапасының жақсаруы арқылы бағалау маңызды.
Өз кезегінде Ұлттық экономика вице-министрі Асан Дарбаев өңірлер арасындағы теңсіздікті азайтуға бағытталған мемлекеттік саясаттың негізгі бағыттарын таныстырды. Оның мәліметінше, 2025 жылдың қорытындысы бойынша Өңірлік стандарттар жүйесі аясында елді мекендердің инфрақұрылымдық нысандармен және қызметтермен қамтылу деңгейі 68 пайызға жеткен. Соған қарамастан, қала мен ауыл арасындағы инфрақұрылымдық айырмашылық әлі де сақталып отыр.
Пікірталас кезінде қатысушылар өңірлердің теңгерімді дамуына ықпал ететін қосымша тетіктерді де ұсынды. Ulagat Consulting Group директоры Марат Қайырленов инвестиция тартуға қолайлы жағдай қалыптастырудың маңызына тоқталса, Қарағанды облысы басқарушы және сервистік компаниялар қауымдастығының төрайымы Ирина Юртанова тұрғын үй қорын басқару жүйесін жетілдіру мен инженерлік инфрақұрылымды дамытуға қатысты ұсыныстарын жеткізді.
Сондай-ақ жиында ауылдық аумақтарды дамыту, агроөнеркәсіп кешенін қолдау, экология және энергетика салаларындағы өзекті мәселелер де кеңінен қаралды.
Іс-шараны қорытындылаған Рауан Кенжеханұлы мемлекеттік өңірлік саясаттың басты өлшемі нақты нәтиже болуы керектігін атап өтті. Сессия барысында айтылған ұсыныстар алдағы уақытта өңірлік саясатты жетілдіру бағытындағы жұмыстарда ескерілетін болды.
