Semeytany.kz – Абай облысының әкімі Берік Уәли Семей қаласындағы аулаларды абаттандыру барысымен танысты. Қалада «Аулаішілік аумақтарды ағымдағы жөндеу» бағдарламасы аясында биыл 22 аула жаңартылмақ. Оның жартысы – оң жағалауда, жартысы – сол жағалауда орналасқан. Сонымен қатар, халық қатысатын бюджет жобасы бойынша тағы 13 аула абаттандырылады.
Балалар алаңы, спорт алаңы, сәулеттік шағын формалар орнатылады
Аулаішілік жұмыстар аясында тұрғындар үшін балалар ойын алаңдары, спорт алаңдары мен сәулеттік шағын нысандар қойылады. Қазіргі таңда 12 үйдің ауласында жөндеу жұмыстары басталып кеткен.
Облыс әкімі Засядко көшесі, 88-үйдің ауласында жүргізіліп жатқан жөндеуді өз көзімен көріп, тұрғындармен тілдесті. Аула тұрғындары атқарылып жатқан жұмыстарға ризашылықтарын білдірді.
– Ауламыз жаңарып жатқанына өте қуаныштымыз. Бұл күнді көп күттік. Балаларымызға арналған ойын алаңы салынуда. Енді ескі гараждардың орнына автотұрақ салып берсе деген өтінішіміз бар, – деді тұрғын Марат Дулуғанов.
Жөндеу 10 күн ішінде аяқталады
Мердігерлердің айтуынша, Засядко көшесіндегі жұмыстар 10 күн ішінде толық аяқталады. Ал облыс әкімі жөндеудің сапалы әрі уақытылы жүргізілуін қадағалауды тапсырды.
– Қазір Семейде 35 ауланы абаттандыру жоспарланып отыр. Жыл соңына дейін тағы 5 аула мен 5 қоғамдық кеңістік (арбаттар мен шағын саябақтар) жасақталады. Келесі жылы 150 аула жаңартылады. Осылайша кезең-кезеңімен облыс орталығындағы барлық аулаларды жаңғыртамыз. Қала әкімінің міндетін атқарушы Бекжан Бапышев осы жұмыстарды жіті бақылап, тұрғындармен кері байланыста болуы тиіс, – деді Берік Уәли.
Жаңғырту жұмыстары аяқталған соң қала тұрғындары үшін қолайлы әрі заманауи өмір сүру ортасы қалыптасады деп күтілуде.
