Semeytany.kz – Жаз мезгілінде маса шағуы – көпшілік үшін жағымсыз жағдайлардың бірі. Дегенмен кей адамдарды масалар жиі шағып, енді біреулерін мүлде айналып өтетіні жиі байқалады. Бұл құбылыстың ғылыми негізі бар, дейді мамандар. Бұл туралы Anyqtime.kz ақпараттық порталы хабарлайды.
Масалар “таңдағыш” келеді
Зерттеулерге сүйенсек, масалар адамды иісіне, терісіне, тіпті қан тобына қарай таңдайды. Әсіресе бірінші қан тобының иелері оларға ерекше тартымды. Сондай-ақ оң резус-факторлы адамдарды да жиі шағатыны анықталған.
Көмірқышқыл газы – негізгі бағдар
Масалар адамның демі арқылы бөлінетін көмірқышқыл газын (CO₂) оңай сезеді. Бұл газды көбірек бөлетін – жүкті әйелдер, спортпен белсенді айналысатындар, яғни ағзасында зат алмасуы жоғары адамдар масалардың басты нысанасына айналады.
Дене жылуы мен тер иісі де әсер етеді
Адам терлеген кезде бөлінетін сүт қышқылы, аммиак және зәр қышқылы масаларға тартымды. Сонымен қатар, теріде болатын кей бактериялар да ерекше иістер шығарып, бұл жәндіктерді қызықтырады.
Киім түсі мен иіссу маңызды
Мамандардың айтуынша, масалар қара түсті киімге көбірек шабуылдайды. Ал гүлді, тәтті иісті парфюмдер мен лосьондар да оларды тарта түседі. Керісінше, лаванда, эвкалипт секілді табиғи эфир майлары масаларды үркітуге көмектеседі.
📌 Мамандардың кеңесі: жазда ашық түсті киім киіп, иіссіз немесе табиғи хош иісті құралдарды пайдаланған жөн. Сондай-ақ, дене терісін құрғақ ұстау да – маса шағуын азайтудың бір жолы.
