Semeytany.kz – Абай облысында 7 сәуірден бастап өрт қауіпті кезеңі ресми түрде басталды. Осыған орай өңірде табиғи өрттердің алдын алу үшін ауқымды профилактикалық іс-шаралар қолға алынуда. Бұл туралы өңірлік коммуникациялар қызметінде өткен баспасөз мәслихатында облыстық ТЖД Мемлекеттік бақылау басқармасы бастығының орынбасары міндетін атқарушы Әсет Түйінбаев мәлімдеді.
Өрт саны күрт артқан
Маманның айтуынша, биыл өңірде орман өрттері былтырғы жылмен салыстырғанда айтарлықтай көбейген. Мәселен, 2023 жылы 24 орман өрті тіркелсе, биыл бұл көрсеткіш 111-ге жеткен. Бұдан бөлек, дала алқаптарында 2 ірі және 139 ұсақ өрт оқиғасы тіркеліп, жалпы саны 4,4 есе өсіп отыр.
Мобильді топтар мен айыппұлдар
Өрттің алдын алу мақсатында азаматтық қорғау, полиция, орман шаруашылығы және жергілікті атқарушы органдардан құралған 170 адамдық 38 мобильді топ құрылған. Бүгінге дейін 330-дан астам рейд жүргізіліп, нәтижесінде 93 адам әкімшілік жауапкершілікке тартылған. Айыппұл сомасы 4,4 миллион теңгеден асты.
Тікұшақтар, дрондар және дала десанты
Өртті бақылау және жедел сөндіру мақсатында шалғай аумақтар мен «Семей орманы» маңында спутниктік дрондар мен механикаландырылған күзетшілер жұмыс істеп жатыр. Қол жетпейтін аймақтарда жұмыс істеу үшін су төгетін құрылғымен жабдықталған екі Eurocopter H‑125 және Ми‑8 тікұшақтары жұмылдырылған. Сонымен қатар, 30 адамнан тұратын арнайы десанттық жасақ құрылған.
Минералданған жолақтар мен ерікті жасақтар
Өңірдегі 269 елді мекенде құрғақ шөптерден тазарту жұмыстары жүргізілген. Орман өртінің таралуын шектеу үшін 1,7 мың шақырым минералданған жолақ жасалды. Қазіргі таңда облыста 70 өрт сөндіру бекеті мен 10 ерікті құрам белсенді жұмыс істеп жатыр.
Халыққа ескерту
Абай облыстық ТЖД тұрғындарды орман мен далада от жақпауға, темекі тұқылын тастамауға және шыны бөтелке секілді өрт қаупін тудыратын заттарды қалдырмауға шақырады. Өрттің алдын алу – әр азаматтың ортақ міндеті.
