Semeytany.kz – Абай облысының әкімі Берік Уәли Курчатов қаласына арнайы жұмыс сапарымен барып, тұрғындармен кездесті. Жиында аймақ басшысы қаладағы әлеуметтік-экономикалық даму көрсеткіштері мен алдағы жоспарлар жайлы баяндап, тұрғындардың ұсыныс-пікірін тыңдады.
Курчатов – стратегиялық маңызы бар қала
Кездесудің басында Курчатов қаласының әкімі Болат Әбдірәлиев 2024–2025 жылдарға арналған даму көрсеткіштерімен таныстырды. Артынша сөз алған облыс әкімі қаланың ерекше маңызына тоқталды.
– Курчатов – шағын болса да, стратегиялық маңызы зор шаһар. Бұл – Ұлттық ядролық орталық орналасқан қала. Қазіргі уақытта «Ғылымды қажетсінетін аумақтарды» дамыту туралы заң жобасы дайындалып жатыр. Алдағы жыл Курчатов үшін тарихи жыл болады деп сенеміз, – деді Берік Уәли.
Жылу, су, жол, баспана – басты назарда
Аймақ басшысының айтуынша, облыстың жалпы өңірлік өнім көлемі 4,3 пайызға өсіп, 3,2 трлн теңгеге жеткен. Ал Курчатовтағы инфрақұрылым мәселелерін шешуге нақты қадамдар жасалуда:
-
Жылу маусымына дайындыққа 3,5 млрд теңге бөлінсе, оның ішінде қаланың қазандықтары мен желілерін жөндеуге 381,6 млн теңге қарастырылған. Қалада бірыңғай жылу көзі салынбақ. Жобаның болжамды құны – 18 млрд теңге.
-
Ауыз сумен қамту бойынша 33 жоба жүзеге асуда. Сорғы-сүзгі станциясын жөндеуге 188,5 млн теңге бөлінген.
-
Қала жолдарының 36 пайызы ғана қанағаттанарлық жағдайда. Биыл көшелерді реконструкциялауға Ұлттық қордан 700 млн теңге бөлінді.
-
Курчатовқа 70 жалға берілетін пәтер берілмек. 4 мектепке ағымдағы жөндеу жұмыстары жоспарланған, №3 мектепке пәндік кабинет сатып алынады.
Медицина мен мәдениетке де көңіл бөлінуде
Қалалық аурухананың 4-ші қабатын жөндеуге – 196,9 млн теңге, құрал-жабдықтарға – 102,4 млн теңге бағытталған. Облыс бойынша 6,9 млрд теңгеге медициналық техника сатып алынбақ.
Мәдениет үйінің қасбеті жаңарып, дене шынықтыру-сауықтыру кешенінің құрылысы басталады. Балалар лагері де жөнделетін болады.
Халықтың ұсыныстары ескерусіз қалмайды
Кездесу соңында тұрғындар жас мамандарға арналған тұрғын үй салу, бос тұрған ғимараттарды тиімді пайдалану сынды ұсыныстарын жеткізді. Облыс әкімі бұл ұсыныстардың барлығы ескерілетінін және Курчатовтың дамуы алдағы уақытта да басты назарда болатынын айтты.
– Курчатов қаласының болашағы зор. Қолдау көрсетеміз. Халық саны артып, қала қарқынды дамитын болады, – деді Берік Уәли.
