Semeytany.kz – Абай облысының әкімі Берік Уәлидің төрағалығымен өткен жиында «Таза Қазақстан» экологиялық бағдарламасының орындалу барысы талқыланды. Мәжілісте тұрмыстық қатты қалдықтарды басқару, полигондарды заңдастыру, заңсыз қоқыс үйінділерін жою секілді маңызды мәселелер көтерілді.
Облыстық табиғи ресурстар және табиғат пайдалануды реттеу басқармасы басшысының міндетін атқарушы Асқар Тұмарбектің мәліметінше, өңір аумағында 170 тұрмыстық қатты қалдықтар полигоны тіркелгенімен, тек 6 полигон ғана заң талаптарына толық сай келеді. Қалғандарына тиісті құжаттар рәсімделмеген. Қазіргі таңда 16 арнайы ұйым қалдықтарды шығарумен айналысады. Сонымен қатар, облыста коммуналдық қалдықтарды басқару бойынша 10 жоба әзірленген.
2023-2025 жылдарға арналған экологиялық іс-шаралар жоспары аясында Бородулиха, Жарма, Үржар, Абай және Ақсуат аудандарында 6 жаңа полигон салу көзделіп отыр. Бұл бағыттағы жобалық-сметалық құжаттар әзірленуде.
Ғарыштық мониторинг нәтижесінде облыс аумағында 30 заңсыз қоқыс орны анықталып, олардың барлығында тазарту жұмыстары басталған.
Жиынға барлық қала-аудан әкімдері, полиция департаменті мен «Amanat» партиясының өкілдері қатысып, өз аумақтарындағы тазалық шаралары туралы есеп берді.
Аймақ басшысы Берік Уәли әрбір аудан мен қала әкімдеріне полигондарды бақылауға алып, оларды заңдастыруды, қоғамдық бақылауды күшейтуді, тұрғындарға түсіндіру жұмыстарын жүргізуді, арнайы ескерту белгілерін орнатуды және бейнебақылау камераларын көбейтуді тапсырды.
– «Таза Қазақстан» бағдарламасы аясында атқарылып жатқан жұмыстар жақсы. Бірақ мұнымен тоқтап қалуға болмайды. Әсіресе биыл Абайдың 180 жылдық мерейтойына дайындық аясында тазалық мәселесіне баса назар аударуымыз керек. Өңірге көп қонақ келеді. Сондықтан бұл бағыттағы жұмыстарды күшейту қажет, – деді облыс әкімі.
