Semeytany.kz – 2025 жылғы 16 шілдеде Абай облысы бойынша Шекара қызметінің «Байтанат» шекаралық бақылау бөлімшесінде ірі көлемде шетел валютасын алып өтпек болған азамат ұсталды.
ҚР ҰҚК мәліметінше, КамАЗ жүк көлігін тізгіндеген Ресей Федерациясының азаматы Қазақстаннан Ресейге 37 349 АҚШ долларын (яғни, 19 млн 637 мың теңгеден астам) алып өтпек болған. Алайда бұл әрекет 2022 жылғы 14 наурыздағы ҚР Президентінің №830 Жарлығына қайшы болғандықтан, шекарадан өткізілмеді.
Сол күні «Ауыл» теміржол шекаралық бақылау бөлімшесінде де тағы бір заң бұзушылық тіркелді. Ресей азаматшасы кәмелетке толмаған қызымен шекарадан өту кезінде, қызының туу туралы куәлігінің жарамдылық мерзімі өтіп кеткені анықталған. Бұл жағдайға байланысты шекарашылар профилактикалық сипаттағы түсіндіру жұмыстарын жүргізіп, азаматтарға мемлекеттік шекарадан өту тәртібін сақтау керектігін ескертті.
Құзырлы орган өкілдері шекарадан өту кезінде құжаттардың мерзімі мен заңнама талаптарына мұқият қарауға шақырады.
