Semeytany.kz – Абай облысында көктемгі сенбіліктер қарқынды жүргізіліп, 39,3 мың тоннадан астам тұрмыстық және құрылыс қалдықтары арнайы полигондарға жеткізілді. Бұл туралы облыстық Табиғи ресурстар және табиғат пайдалануды реттеу басқармасы мәлім етті.
Сәуір-мамыр айларында өткен «Таза Қазақстан» экологиялық акциясы аясында өңір бойынша 227 мыңнан аса адам, 10 мыңнан астам ұйым және 4 мыңнан астам техника жұмылдырылған. Сенбілік барысында 132 мың аула, 1900 саябақ пен сквер және 100 шақырымға жуық арық бойы тазартылды.
Мекеменің бас маманы Нұрдаулет Мұқашовтың айтуынша, екі айлық ішінде 6 мыңға жуық құқықбұзушылық анықталып, 50 миллион теңгеден астам айыппұл салынған. Экологиялық мәдениетті көтеру мақсатында БАҚ пен әлеуметтік желілерде 200-ден астам ақпараттық материал жарияланып, 600-ден аса экологиялық іс-шара мектептер мен колледждерде ұйымдастырылған.
Сондай-ақ, көктемгі көгалдандыру жұмыстары шеңберінде 23 мыңнан астам ағаш көшеті отырғызылды. «Түлектердің ағаш егуі» және «Болашақты бірге отырғызамыз» атты акциялар барысында қосымша 11 мың ағаш егілген. Ал «Семей орманы» аумағында 1,5 гектар жерге 3400-ден астам жасыл желек отырғызылды.
Жасыл инфрақұрылымды дамыту мақсатында «Жасыл Ел Абай» коммуналдық мемлекеттік мекемесі құрылып, Семей қаласының сол жағалауында «жасыл белдеу» қалыптастыру жоспары қолға алынған. Мекеме директорының орынбасары Дамир Рахимжановтың айтуынша, алдағы уақытта көшетхана мен жылыжай салынып, Бейбітшілік аралында экосаябақ пен балалар алаңы, Озер ауылдық округінде арнайы агроаймақ құрылмақ.
Табиғатты қорғау бағытындағы жұмыстар бұдан әрі де жүйелі түрде жалғаспақ.
