Semeytany.kz – Бүгін облыс әкімі Берік Уәли мен «China Railway Asia-Europe Construction Investment Co.LTD» компаниясының бас директоры Чжоу Хайвэй Семей қаласының айналма жолын салуға қатысты келісімге қол қойды.
Қазақ-қытай консорциумы жүзеге асыратын бұл ірі жоба 2024 жылдың тамыз айында басталып, 2028 жылға дейін жалғасады. Жоба Қазақстанның 2030 жылға дейінгі көлік-логистикалық әлеуетін дамыту тұжырымдамасы аясында халықаралық қаржы институттарының қолдауымен жүзеге аспақ.
Айналма жолдың салынуы Семей қаласының көлік жүктемесін азайтып, облыстың транзиттік әлеуетін арттыруға мүмкіндік береді. Айта кетейік, қазірдің өзінде облыс орталығындағы аспалы көпір арқылы жылына 700 мыңға жуық көлік өтеді.
Берік Уәли бұл жоба екі ел арасындағы ұзақмерзімді және өзара тиімді ынтымақтастықтың нақты көрінісі екенін атап өтті. Тамыз-қыркүйекте техникалық-экономикалық негіздеме жасалып, қазан-қарашада алдын ала жоба әзірленеді. Жол айырықтары мен көпірлердің сызбасы әкімдікпен келісіліп, жыл соңына дейін құрылысқа дайындық басталады.
Қытайлық тарап та өз дайындығын білдірді. Чжоу Хайвэй Семейдегі жобада Астанадағы LRT құрылысы кезінде жинақтаған тәжірибелерін қолдануға ниетті екенін жеткізді.
Кілт сөздер: .
