Semeytany.kz – Абай облысының әкімі Берік Уәли Жарма ауданына жұмыс сапары аясында Қалбатау ауылындағы Георгиевка орта мектебінің жай-күйімен танысты.
1975 жылы салынған мектеп 500 орынға арналғанымен, бүгінде мұнда 929 оқушы білім алып жүр. Оның ішінде мектепалды даярлық тобында 50 бала тәрбиеленеді. Мұғалімдер саны – 89.
Білім ордасы күрделі жөндеуді қажет етеді. Электр желілері мен инженерлік жүйелер ескірген, спорт және акт залдары тозған, мектеп ауласы мен қазандығы да жаңартуды талап етеді. Ең бастысы – ғимараттың жобалық қуатынан екі есеге артық жүктемемен жұмыс істеуі алаңдатарлық жағдай.
Мектепті аралаған облыс әкімі ауылдағы демографиялық өсімді ескере отырып, жаңа мектеп салудың маңызын атап өтті. Қалбатаудағы үш мектептің екеуінде орын тапшылығы бар екенін айтқан Берік Уәли аудан және құрылыс басқармасына жаңа білім ордасына қажетті құжаттарды әзірлеуді тапсырды.
