Semeytany.kz – 2025 жылдың 1 тамызынан бастап елімізде он жылда бір рет өтетін маңызды науқан – Ұлттық ауыл шаруашылығы санағы басталады.
20 қазанға дейін жалғасатын санақ аграрлық сектордағы барлық меншік түрлерін қамтиды. Негізгі мақсат – ауыл шаруашылығының шынайы ахуалын анықтап, нақты статистикалық деректерге сүйене отырып, тиімді саясат қалыптастыру.
Сауалнамаға заңды тұлғалар мен жеке кәсіпкерлер, фермер және шаруа қожалықтары sanaq.gov.kz сайтында онлайн қатыса алады. Бұл үшін компьютер мен ЭЦҚ қажет. Онлайн өтпегендер үшін 20 қыркүйектен бастап интервьюерлер ауылдарды аралап, сауалнама жүргізеді.
Компьютері жоқ азаматтарға ауылдық әкімдіктерде арнайы бұрыштар ұйымдастырылған. Сондай-ақ, аудандық статистика бөлімдерінен де көмек алуға болады.
Санақ – елдің азық-түлік қауіпсіздігі мен ауыл экономикасының болашағын айқындайтын маңызды құрал. Сондықтан әрбір азаматтың белсенді қатысуы қажет. Сұрақтар туындаса, 1446 нөміріне хабарласып, тегін кеңес алуға болады.
