Semeytany.kz – Облыс әкімі Берік Уәлидің төрағалығымен өткен әкімдік отырысында инфрақұрылымдық жобалардың орындалуы, коммуналдық жағажайлардың жағдайы және «Таза Қазақстан» бағдарламасының жүзеге асырылу барысы кеңінен талқыланды.
Жиында жағажайлардың санитарлық ахуалына ерекше назар аударылды. Мемлекет басшысының Алакөлге қатысты сынынан кейін өңірдегі 24 коммуналдық жағажайға мониторинг жүргізілген. Нәтижесінде Бесқарағай және Бородулиха аудандарындағы жағажайларда заң талаптарының бұзылғаны анықталды.
Берік Уәли жағажайларға иелік ететін мекемелерді нақтылап, рұқсатсыздарын тізімнен шығаруды, санитарлық талаптарды күшейтуді, жағажай пайдалану ережелерін бекітуді және кәсіпкерлерге жалға беру мүмкіндігін қарастыруды тапсырды. Аймақ басшысы Көкпекті ауданындағы жағажайды үлгі ретінде атап өтіп, барлық әкімдерге тазалық пен тәртіпке жауапкершілікпен қарауға шақырды.
Сонымен қатар, отырыста «Жайлы мектеп», «Ауылдық денсаулық сақтауды жаңғырту», «SMART CITY SEMEY» сынды жобалар мен ауызсу мәселесін шешуге арналған 33 жоба талқыланды.
Кілт сөздер: Абай облысы, жағажайлар, санитарлық жағдай, Берік Уәли, Таза Қазақстан.
