Semeytany.kz – Семей қаласының орталығындағы 2018 жылдан бері жөндеу көрмеген айналма жолда асфальт төсеу жұмыстары басталды. Аталған нысанмен облыс әкімі Берік Уәли арнайы барып танысты.
Айналма жол – қаланың негізгі көлік желісінің бірі. Ол оң және сол жағалауды байланыстырып, бірнеше магистральмен түйіседі. Қазір мұнда ескі жабынды алынып, екі қабатты жаңа асфальт төселуде. Жөндеу аумағы – 24 мың шаршы метр, яғни 1,2 шақырым. 1 тамызға дейін жолдың бір бағыты толық ашылады деп жоспарланған.
Облыс басшысы мердігерлерге жұмысты сапалы әрі мерзімінде аяқтауды тапсырды. «Бұл жол осыдан 26 жыл бұрын салынған. Абайдың 180 жылдығына орай Семейге келетін меймандарға ыңғайлы жағдай жасауымыз қажет», – деді Берік Уәли.
Жалпы, биыл Семей қаласында 52 көшеде жөндеу жүргізілуде. Оның ішінде 36 көше алғаш рет асфальтталады. Қаланың 40 ауласында да ішкі жолдарды жаңарту жұмыстары қызу жүріп жатыр. Ал облыс бойынша 391 шақырым жол жөнделеді.
