Semeytany.kz – Абайдың 180 жылдық мерейтойына арналған онкүндік аясында Семей қаласындағы Мұхтар Әуезов атындағы педагогикалық колледжде «Abai akademiasy» атты тұңғыш энциклопедиялық порталдың тұсаукесері өтті.
Порталдың таныстырылымына облыс әкімі Берік Уәли, зиялы қауым өкілдері мен абайтанушы ғалымдар қатысты. Жобаның жетекшісі Айжан Тәбаракқызы жиналғандарға платформаның құрылымы мен мазмұнын таныстырды.
Аталған портал Абай мұрасын ғылыми-танымдық тұрғыда жинақтап, ақын шығармаларын текстологиялық негізде ұсынады. Онда Абайдың әдеби, ғылыми, публицистикалық еңбектері мен хаттары, деректі фильмдер, теле-радио хабарлар цифрлық түрде шоғырланған. Материалдар арнайы институттар мен архивтерден алынған.
Облыс әкімі Берік Уәли онкүндікке демеушілердің қолдауымен ешқандай бюджет қаржысы жұмсалмағанын айтып, бұл мерейтойдың ең үлкен сыйы – еліміздің әр өңірінен Абай облысына тарту етілетін әлеуметтік нысандар екенін атап өтті. Мысалы, Ақтөбе облысы Жекпе-жек орталығын, Астана «Жайлы мектепті», Маңғыстау «Достық үйін» салып бермек.
– Мемлекет басшысы Қасым-Жомарт Тоқаев «Абай және 21 ғасырдағы Қазақстан» мақаласында Абайдың ілімі мен мұрасы ұлттың ілгерілеуіне бағдар болуы керектігін атап өткен. Бүгінгі портал – осы идеяның нақты жүзеге асуы, – деді аймақ басшысы.
Тұсаукесерде абайтанушы Арап Еспенбетов пен әдебиеттанушы Қарлығаш Әубәкір порталдың ғылыми, мәдени маңызын ерекше атап өтті. Портал көпшілікке қолжетімді, білім алуға ынталы кез келген жан үшін құнды дереккөзі болмақ.
Айта кетейік, бүгінгі күні этноауыл қалашығы ашылып, Аңсаған Мұстафаның көрмесі, Абай туралы фильмдер көрсетілімі және гала-концерт те жоспарланған.
