Semeytany.kz – Семей қаласында Абай Құнанбайұлының 180 жылдық мерейтойына арналған онкүндік аясында белгілі суретші Аңсаған Мұстафаның «Көңілге түрлі ой салар» атты авторлық көрмесі ашылды.
Аңсаған Мұстафа бұл көрмеге 1,5 жыл дайындалып, ұлы ойшылдың рухани мұрасын заманауи бейнелеу өнері арқылы жеткізуді мақсат еткен. Экспозицияға 58 туынды қойылған.
– Әр туындыны салмас бұрын Абайдың қара сөздері мен өлеңдеріне қайта үңілдім. Ақынның ойларын визуалды түрде беру – үлкен жауапкершілік, – дейді суретші.
Көрмеде ар-намыс, талап пен еңбек, рухани кемелдік, жүрек, ақыл, қайраттың үйлесімі сынды Абай көтерген мәңгілік тақырыптар қамтылған. Әр суреттің жанында Абай шығармаларынан алынған нақыл сөздер ұсынылған.
Аңсаған Мұстафаның арт-пластика жанрындағы еңбектері осыған дейін әлемнің 30-дан астам елінде өткен 155 көрмеге қатысқан. Оның шығармалары Корея, Түркия, Италия, Франция, АҚШ, Жапония, Иран және Үндістанда жұртшылыққа ұсынылған.
