Semeytany.kz – Семейде Мұхтар Әуезов алаңында «Абай мұрасы – халық даналығы» атты әдеби кеш ұйымдастырылды. Шара ұлы ойшылдың 180 жылдығына арналды.
Кешті Абай облысы Жастар саясаты басқармасы қала әкімдігінің қолдауымен өткізді. Оған жастар, қала тұрғындары мен қонақтар, түрлі сала мамандары қатысты. Басқарма басшысының міндетін атқарушы Олжас Бейсенбаевтың айтуынша, мұндай шаралар жастарға Абайды жақын танытуға бағытталған.
– Бұл кешке тек семейліктер ғана емес, Жамбыл облысы мен Шымкент қаласының жастары да үн қосып отыр. Ашық алаңда Абай шығармасын насихаттаудың тәрбиелік мәні зор, – деді ол.
Шара барысында Абай әндері хормен де, жеке дауыста да орындалып, өлеңдері көркем мәнермен оқылды. Ашық микрофон алаңында жастар қара сөзден үзінді оқып, өз туындыларын тарту етті. Әдеби кешке «Жұмысшы мамандықтар жылы» аясында түрлі сала мамандары да қатысып, Абайға деген құрметін өнер арқылы көрсетті.
Абай мұрасын насихаттауға арналған бұл кешке жасы 80-нен асқан қария да, Абаймен алғаш танысқан бүлдіршін де қатысты.
