Кеш барысында күй өнерінің дарабозы Секен Тұрысбековтің сырлы сазға, терең философиялық мазмұнға құрылған шығармалары орындалып, көрермен жүрегінен орын алды. Оның күйлері арқылы қазақ халқының болмысы, табиғатқа, өмірге, адамға деген көзқарасы саз тілімен өрнектелді.
Қала тұрғындары мен қонақтары, өнерсүйер қауым кешке көптеп жиналып, залға лық толған көрермен қазақтың дәстүрлі өнерін ерекше ықыласпен қабылдап, шынайы ризашылықтарын білдірді.
«Ақ жауын» мемлекеттік камералық оркестрі дәстүрлі саз өнері мен заманауи классиканы шебер ұштастырып, Абай шығармаларына арналған музыкалық интерпретацияларды жоғары деңгейде ұсынды. Оркестр орындауындағы әрбір шығарма көрерменге терең ой салып, әсерлі әуендерімен тыңдаушының жүрегінде ерекше із қалдырды.
«Семей батыры» мықтыларды сынады
Абайдың 180 жылдығына арналған мерейтойлық онкүндік аясында Семей қаласында, Ертістің жағалауында, «Семей батыры» күштік экстрим турнирі өтті. Қаланың спортсүйер жұртшылығы асыға күткен бұл дода бұған дейін екі рет ұйымдастырылған. Биылғы турнирге еліміздің бірнеше өңірінен келген сайыпқыран спортшылар қатысты.
– «Семей батыры» турнирі – мықты жігіттердің басын қосатын ерекше жарыс. Турнир осыған дейін қала көлемінде екі рет өтті. Спортшылардың жарысты жарақатсыз, сәтті аяқтауына тілектеспін, – деді турнирдің ашылуында сөз сөйлеген Семей қаласы әкімінің міндетін атқарушы Бекжан Бапышев.
Жарысқа қатысушылар 70 келілік ауыр қапты көтеріп жүру, 70 келілік зерхерді барынша ұзақ ұстап тұру, 32 келі тартатын гір тасын жұлқа көтеру, 50 келілік бөренені мойнына қойып отырып-тұру, ауыр салмақтағы дөңгелекті аудару, 70 келілік екі гантельмен фермерлік серуен жасап, 20 минут бойы автобус сүйрету сынды сайыстарда күш сынасты.
Семей қаласы дене шынықтыру және спорт бөлімінің басшысы міндетін атқарушы Қуат Исажанов турнирдің аясы кеңейіп келе жатқанын атап өтті.
— Бұл – спортшылардың шыдамдылығы мен күш-жігерін талап ететін нағыз батырлардың сайысы. Бұған дейін тек Семейдің спортшылары қатысса, биылғы жарысқа Семейден жеті, Өскеменнен үш, Павлодардан бір спортшы келді. Бәріне сәттілік тілеймін, – деді ол.
Турнирде спортшылардың күш-қайраты ғана емес, ептілігі мен шыдамдылығы да сыналды. Көпшіліктің қошеметіне бөленген қатысушылар өз мүмкіндіктерін барынша көрсете білді.
Сайысқа облысымызд атынынан қатысқан спортшылардың бірі Нұрлан Жұмақанов бұл додаға өзін сынап көру үшін келгенін айтады. Ол, жалпы, қол күресімен айналысады екен, дегенмен экстрим жарысқа да қатысып көруге бел буыпты.
Жарыс қорытындысы бойынша, 1-орынды Өскемен қаласының спортшысы Вадим Макарцов, 2- орынды семейлік жерлесіміз Нұрбол Азизов, 3-орынды Өскемен қаласының батыры Темірлан Кенжеханов иеленді.
Жеңімпаздарға арнайы марапаттар мен бағалы сыйлықтар табысталды.
Кәмшат СЕРІКҚЫЗЫ
