Ұлы ақын Абай Құнанбайұлының 180 жылдығына арналған он күндік мерейтойлық шаралар жоғары деңгейде өтуде. Онкүндік аясында Семей қаласы мен облыстың барлық аудандарында әдеби кештер мен шығармашылық кездесулер, көрмелер мен байқаулар, спорттық жарыстар, марафондар ұйымдастырылуда.
Мерейтойдың алтыншы күні Семей қаласында көру қабілеті шектеулі азаматтарға арналған арнайы кітапхананың жаңа ғимараты пайдалануға берілді. Салтанатты шараға облыс әкімі Берік Уәли, «Самұрық-Қазына» АҚ басқарушы директоры Ғибрат Ауғанов және зиялы қауым өкілдері қатысты.
– Мемлекет басшысы Қасым-Жомарт Кемелұлы Тоқаев «Абай қазақтың дамылсыз оқып-үйренгенін бар жан-тәнімен қалады. «Ғылым таппай мақтанба» деп, білімді игермейінше, биіктердің бағына қоймайтынын айтты. Ол «Біз ғылымды сатып мал іздемек емеспіз», – деп тұжырымдап, керісінше, ел дәулетті болуы үшін ғылымды игеру керектігіне назар аударды. Ұлы Абайдың «Пайда ойлама, ар ойла, Талап қыл артық білуге» деген өнегелі өсиетін де осы тұрғыдан ұғынуымыз қажет» деп атап өткен болатын. Бұл жаңа кітапхана – ерекше қажеттіліктері бар азаматтардың білімге құлшынысы мен ізденістеріне тиісті жағдай жасауда айрықша маңызға ие. Олардың білім алу, шығармашылықпен айналысу, мәдени және рухани даму мүмкіндіктерін кеңейтуде ерекше рөл атқарары сөзсіз. Кітапхана заманауи стандарттарға сай жабдықталған. Мұнда Брайль қарпіндегі әдебиеттер, дыбыстық кітаптар, арнайы техникалық құрылғылар мен сандық ресурстар кеңінен қолжетімді. Кітапханада 41 000-нан астам кітап қоры бар. Мұның барлығы инклюзивті қоғам құру жолындағы нақты әрі маңызды қадам болып саналады, – дей келе облыс әкімі «Самұрық-Қазына» қорына өз ризашылығын білдірді.
Жылына 15 мыңнан астам келушіні қабылдайтын инклюзивті кітапхана «Самұрық-Қазына» қорының Абайдың 180 жылдығына орай өңір халқына жасаған ерекше сыйы болып отыр. Жоба «Samruk-Kazyna Trust» корпоративтік қайырымдылық қорының қолдауымен 410 миллион теңгеге қаржыландырылды. Бұл – еліміздегі өңірлік деңгейдегі ең ірі және заманауи инклюзивті мәдени-әлеуметтік нысандардың бірі.
«Самұрық-Қазына» қоры соңғы бес жылда облысымызда білім, спорт және әлеуметтік осал топтарды қолдау бағытында жалпы құны 2,5 млрд теңгені құрайтын 14 жобаны жүзеге асырған.
– Қазіргі таңда облыс әкімдігімен бірлесіп Семейдің Ұшақтар шағын ауданында 900 млн теңгеге үстел теннисі орталығын салу жоспарлануда. Бұл жерде 4 мыңға жуық тұрғын спортпен айналыса алады. Бұл – аймақтық инфрақұрылымды дамытуға бағытталған бастамаларымыздың бірі, – деді «Самұрық-Қазына» АҚ басқарушы директоры Ғибрат Ауғанов.
Екі қабатты ғимараттың жалпы ауданы – 852 шаршы метр. Нысан зағип және нашар көретін жандардың қажеттіліктеріне бейімделген. Кітапхана заманауи техникалық құрылғылармен жабдықталған. Тифлотехнология кабинеті, Брайль жүйсімен оқу-жазу бөлмесі, дыбыстық әдебиеттер қоры, коворкинг және оқу залдары, библиографиялық ақпараттар бөлімі, әдебиеттерді өңдеу және толықтыру бөлімі бар.
— Кітапханамыздың жаңа ғимараты заманауи талаптарға сәйкес салынған деп ойлаймын. Бұл ерекше кітапхана екен. Өте қуаныштымыз,- дейді. «Шамшырақ» зағип және нашар көретін қорының меңгерушісімін зағип жан Марат Әлиасқаров.
Мұнда ерекше жандардың кедергісіз жүріп-тұруына, білім алуына барлық жағдай жасалған, арнайы тұтқалар да орнатылған. Келешекте кітапхана базасы толық электронды каталогқа көшірілмек. Қазіргі күні кітапхана қорында 41 мыңнан астам кітап бар.
— Бүгін ерекше күн болып тұр. Қазақ «Жанарымды алғанша, жанымды ал» демей ме. Бүгінгі шара дәл осы сөздің салмағын терең ұғындыратын тағылымды оқиға болды. Көз жанарынан айырылғанымен, көкірек көздері ояу, жүректері нұрға толы жандарға арналған орталықтың ашылуына келіп тұрмыз. Жаратқан бір мүмкіндікті алса, екінші бір қасиетті артығымен береді деген тәмсілдің растығына тағы бір мәрте көз жеткіздік. Тағдыр сынына мойымаған жандардың бойынан қайсар рухты байқап келеміз. Жаңа ғимараттың салынуына қолдау білдірген «Самұрық-Қазына» қоры мен облыс басшылығына алғысымыз шексіз. Сіздер жарық дүниенің нұрына зәру жандарға үміт пен мейірімнің сәулесін сыйлап отырсыздар. Бұл – нағыз адамгершіліктің, шынайы жанашырлықтың көрінісі,- деді ақын Тыныштықбек Әбдікәкімов.
Семей қаласы әкімдігі ғимарат маңын абаттандырып, шырша отырғызып, кіреберіс жолдарға асфальт төселді. Кітап қоры толық көшіріліп, кабинеттер мен сөрелер ретке келтірілді.
Кәмшат Серікқызы
