Semeytany.kz – Құрылысшылар күні қарсаңында ҚР Премьер-министрі Олжас Бектенов құрылыс саласының үздік қызметкерлері мен ардагерлеріне Мемлекет басшысы Қасым-Жомарт Тоқаевтың атынан мемлекеттік наградалар табыс етті.
2025 жыл — Жұмысшы мамандықтары жылы деп жарияланғаны белгілі. Осыған орай тұңғыш рет «Қазақстанның еңбек сіңірген құрылысшысы» атағы мемлекеттік марапаттар жүйесіне енгізілді. Премьер-министр саланың ел экономикасындағы орны ерекше екенін айтып, еңбек адамдарына құрмет көрсету – қоғам үшін маңызды қадам екенін атап өтті.
– Президентіміз адал еңбекпен табысқа жеткен әрбір азаматты бағалау қажет екенін үнемі айтып келеді. Құрылысшылардың қажырлы еңбегі – ел дамуының тірегі. Үкімет саланың инвестициялық тартымдылығын арттыруға, жаңа технологияларды енгізуге, кәсіби стандарттарды жетілдіруге қолдау көрсете береді, – деді Олжас Бектенов.
Ресми мәліметке сәйкес, былтыр елімізде 19 млн шаршы метрден астам тұрғын үй пайдалануға берілсе, биылғы жартыжылдықта 120-дан астам мектеп пен балабақша, 30-ға жуық денсаулық сақтау нысаны салынған. Құрылыс жұмыстарының жалпы көлемі 18 пайызға өскен.
Жиында ардагер құрылысшы Қайсар Омаров пен «СAPITAL GROUP ST» ЖШС инженері Бауыржан Махан Мемлекет басшысына алғысын білдіріп, салаға көрсетілген құрметтің зор маңызын атап өтті.
