Semeytany.kz — Үкімет отырысында жаңа оқу жылына дайындық пен «Адал азамат» бірыңғай тәрбие бағдарламасын білім беру ұйымдарына енгізу мәселелері қаралды, деп хабарлайды Primeminister.kz.
Премьер-министр Олжас Бектенов қыркүйек айында 115 мың оқушы орнына арналған 83 жаңа мектепті іске қосу жоспарланғанын мәлімдеді. Соның 57-сі «Жайлы мектеп» ұлттық жобасы аясында пайдалануға беріледі. Бұл үш ауысымды оқыту проблемасын кезең-кезеңімен азайтуға мүмкіндік береді.
Елдің 9 өңірінде нысандарды уақытында аяқтауды жеделдету тапсырылды. «Самұрық-Қазына» қоры әкімдіктермен бірге мектептердің жаңа оқу жылына дейін тапсырылауын қамтамасыз етуі тиіс. Сонымен қатар бірқатар өңірде 34 мектептің жөндеу қарқыны баяу екені айтылды: Алматы қаласы, Абай, Ұлытау, Батыс Қазақстан, Алматы, Қызылорда, Атырау, Ақтөбе және Шығыс Қазақстан облыстары. Әкімдерге жөндеу сапасы мен мерзімін қатаң бақылау жүктелді.
Арнаулы пән кабинеттерін (физика, химия, биология, робототехника) дер кезінде жабдықтау үшін 1 қыркүйекке дейін кемінде 200 кабинет сатып алу тапсырылды. Қауіпсіздік бойынша: білім нысандарында лицензиясы бар күзет, турникеттер, жедел басқару орталықтарына қосылған бейнекамералар міндетті. ІІМ білім беру нысандарын терроризмге қарсы талаптарға сәйкестігі тұрғысынан тексеруді жалғастырады. Қазіргі таңда жекеменшік білім ұйымдарының шамамен 30%-ы қажетті қауіпсіздік құралдарымен толық қамтылмаған.
Мемлекет қолдауына мұқтаж балаларға әлеуметтік көмек көрсету үшін биыл 23 млрд теңгеден астам қаржы көзделді. Бұл кемінде 500 мың баланы қамтуға мүмкіндік береді. Сондай-ақ 1 қыркүйекке дейін барлық оқушыны оқулықтардың толық жинағымен қамтамасыз ету тапсырылды. Балалар Денсаулығы үшін мектептегі тамақтану сапасына бақылау күшейтіледі.
Келесі оқу жылында мемлекеттік тапсырыспен колледждерге техникалық және кәсіптік білім алуға 150 мыңға жуық студент қабылданады. Колледждер дуальды оқыту, өндірістік тәжірибе, кәсіпорындармен әріптестікті кеңейтуі тиіс. ЖОО-лар инфрақұрылым мен жатақханамен қатар, оқу бағдарламаларын еңбек нарығына сай жаңартуы керек. Инженерлік, IT, педагогика және медицина бағыттарындағы кадр тапшылығын өтеуге басымдық беріледі.
Қорытынды тапсырмалар: бір ай мерзімде «Адал азамат» бірыңғай білім беру бағдарламасын іске асыру жөніндегі ведомствоаралық жоспарды бекіту; жаңа оқу жылынан бастап «Назар аударыңыз, балалар» жедел алдын алу шараларын өткізу және БАҚ-та жариялау; жаңадан ашылатын мектептердің маңындағы жол инфрақұрылымын жақсарту; оқушыларға жол қауіпсіздігі және басқа да негізгі қауіпсіздік ережелері бойынша профилактикалық, интерактивті сабақтарды жүйелі жүргізу. Колледждер мен ЖОО-лардың оқу нәтижелері үшін жауапкершілігін арттыру да тапсырылды.
