Аудандық ардагерлер кеңесінің төрағасы Н.Есболовтың бастамасымен бастауыш ардагерлер ұйымдарының жұмысын жандандыру мақсатында ұйымдастырылған семинардың жұмысына ауданның шалғай ауылдарынан бастауыш ардагерлер кеңестерінің төрағалары мен мүшелері келіп қатысты. Қай уақытта, қай жаста болсын, қоғамдық істерден шет қалмайтын ардагерлер бұл жолы да ұйымшылдық пен белсенділіктің үлгісін көрсетті. Семинарға Аягөз ауданымен шектесетін Үшбиік ауылынан Мерғали Қабаев, Аршалыдан Нұрбек Ақбаев, Жарма кентінен Тәуірбек Наушабаев, Қаратөбеден Жұмағазы Нұрғалиев, Шар қаласынан Тоқтарбек Айқынбеков, Божығұрдан Құрманғали Бұқаров сынды ардагерлер, сондай-ақ жаңадан сайланған төрағалар келді.
Бұл жиынның Әуезов кентінде өтуі бекер емес. Бүгінде жылдан-жылға көркейе түскен бұл кенттің тіршілігі жанданып келеді. Мұндағы ардагерлер кеңесін зейнеткер ұстаз, көп жылдан бері қоғамдық жұмыстардың бел ортасында жүрген Елеусіз Жангөбекова басқарады. Кеңес мүшелері Шаяхметов Төлеуғазы, Ысқақов Серікхан, Рахымбаев Серікхан, Әзілжанов Дулат сияқты азаматтар төрайыммен бірге ұйымшылдықпен жұмыс жүргізіп, барлық маңызды мәселелерді ақылдаса отырып шешеді.
Кент ардагерлеріне әкімшілік ғимаратынан арнайы орын берілген екен. Кеңседегі құжаттардың ұқыпты сақталуы, жұмыс мәдениеті семинарға қатысушыларға үлкен әсер қалдырды. Шараға жиналғандар кенттегі ардагерлер кеңесінің жұмысымен танысып, өзара тәжірибе алмасты.
Семинардан соң қонақтар кентті аралады. Алдымен Мұхтар Әуезовтің ескерткішіне барып жазушының рухына тағзым етіп, гүл шоқтарын қойды. Осы ескерткіштің ашылу салтанатына кезінде жазушының ұлы Мұрат Әуезовтің өзі қатысып, «Әкемнің мүсіндерінің ішінде дәл өз бейнесіне ұқсайтыны осы» деп жоғары баға берген екен.
Осыдан соң ардагерлер белгілі меценат Қалиев Оразхан Амалханұлы салдырған зәулім мешітке барып, Құран оқыды. Бүгінде Ресейде тұратын кәсіпкер Оразхан Амалханұлы жерлестеріне үнемі қолдау көрсетіп келеді. Келесі кезекте аға буын өкілдері Орталық саябақты аралап, Ұлы Отан соғысы жауынгерлеріне қойылған ескерткіштің жанында батырлардың рухына тағзым етті.
Семинарға қатысушылар Бақыршық орта мектебіне де бас сұқты. Мектепте жаңа оқу жылына дайындық жүріп жатыр екен. Білім ошағы қазіргі заманға сай жабдықталған. Абаттандырылған кең алаңда ауылдың барлық іс-шаралары өтеді екен.
Кенттегі жаңа үлгіде салынған мәдениет үйі мен Бақыршық Мамайұлының биік ескерткіші қонақтардың назарын бірден өзіне аударды. Ескерткіште Бақыршық бай елін жоғарыдан барлап тұрғандай. Мүсінді меценат Жомарт Садуақасов жасатқан екен.
Кентте атқарылып жатқан игі істердің басында демеуші кәсіпорын – Бақыршық тау-кен өндіру кәсіпорны тұр. Осы кәсіпорынның қоғаммен байланыс директоры Тимур Өткелбаев семинарға арнайы келіп қатысып, мекеменің әлеуметтік жобалары жайлы айтып берді. Кәсіпорында мыңнан астам адам жұмыс істейді, қосымша мердігерлермен бірге екі мыңға жуықтайды. Жұмысшылардың 80 пайыздан астамы – Абай және Шығыс Қазақстан облыстарының тұрғындары, оның ішінде 34 пайызы Жарма ауданынан.
Тимур Өткелбаевтың айтуынша, қазіргі күні кәсіпорын Жарма техникалық колледжімен бірлесіп, мамандар даярлауда. Білім беру ұйымдарына гранттар бөлініп, оқушылар тәжірибеден өтеді. 2022 жылдан бері әлеуметтік-экономикалық меморандум аясында кентке 460 млн теңгеден астам қаржы бөлінсе, 2024 жылы бұл сома 765 млн теңгеге жеткен. Аталған қаржы мәдениет, білім, инфрақұрылым, медицина салалары мен қайырымдылық шараларға жұмсалған.
Әуезов кентінің көшелері жөнделіп, балабақшалар, балалар алаңдары, мектептер, мәдениет үйі, дәрігерлік амбулатория, әкімшілік ғимараттары жаңартылып жатыр. Аталған кәсіпорын “Батыр” хоккей командасына демеушілік қолдау көрсетіп келеді, әлеуметтік жағдайы төмен отбасылар мен көп балалы аналарға да көп көңіл бөлінеді.
Семинар соңында қатысушыларға дастарқан жайылып, концерт ұйымдастырылды. Әуезов кентінің Әжелер ансамблі ұлттық әндерден шашу шашты. Ансамбль жетекшісі Күміс Сейітқазинова әже 70 жасқа келсе де қимылы ширақ. Оның жетекшілігіндегі ансамбль облыстық байқауда жүлделі 3-орынды иеленген. Өнер ұжымы Әуезовтің мәдени өміріне серпін беріп келеді. Кенттегі бірде-бір мәдени іс-шара Әжелер ансамблінің қатысуынсыз өтпейді деуге болады. Күміс апай мен оның ансамблі шипажайда да өнер көрсетеді. Ресейлік басылымда да Әжелер жайлы мақала жарық көрген.
Іс-шара соңында аудандық ардагерлер кеңесінің төрағасы Н.Есболов семинарға қатысқан ардагерлерге алғысын жеткізді.
Әуезов кентінің байлығы – жерінде, ырысы – бірлігінде. Ауызбіршілікпен атқарылған істердің нәтижесінде кенттің әлеуеті артып, бүгінде көпке үлгі боларлық игі бастамалардың ошағына айналып отыр.»
Жұмабақыт РАХМЕТОВА,
Қалбатау ауылы, Жарма ауданы
