Осыдан жиырма жыл бұрын аудандағы байырғы білім ордаларының бірі — Ақсуат орта мектебіне мемлекет қайраткері Кәрім Нұрбаевтың есімін беру туралы ұсынысты талқылау үшін жиын өтті. Алайда бұл ұсынысты жұртшылықтың бәрі бірдей қолдай қоймады. Көпшілік осы білім ордасында қырық жылдан астам уақыт еңбек етіп, ауданда алғаш болып Қазақ ССР-нің еңбек сіңірген мұғалімі атағын алған ұлағатты ұстаз Қабдрахман Оразалиннің есімін беру керек деген пікірде болды. Расында, бұл мектепке Оразалин есімі әбден лайық еді.
Дегенмен нақты шешім шығаруға ауданның Құрметті азаматы, осы жолдардың авторының нағашысы Малдыбай Рахымановтың пікірі ықпал етті. Ол кісі пікірталаста қарсы тарапты сабырға шақырып, Қабдрахман Оразалиннің есімі сол кезде «орыс мектебі» аталып кеткен орта мектепке беріледі деп сендірді.
Алайда уақыт өте келе жағдай басқаша өрбіді. Әлгі орыс мектебіне Қабдрахман Оразалиннің емес, Қожакелді батырдың есімі берілді. Әрине, Қожакелді — бір елдің ұранына айналған тарихи тұлға, ел үшін басын бәйгеге тіккен батыр. Алайда оның өмір жолының білім саласына тікелей қатысы жоқ екені белгілі.
Ой көзімен қарасақ, бұл екі атаудың орны ауысып кеткені байқалады. Тоқабай руынан шыққан Қожакелдідей батырдың есімін мектепке беру аздық ететін секілді. Батыр есімін мектепке емес, ауылға беру әлдеқайда орынды болар еді. Ақсуаттың іргесіндегі Екпін ауылы, негізінен, тоқабайлардың мекені. Ендеше, дәл осы ауылға Қожакелді батырдың есімі берілсе, тарихи әділет тұрғысынан дұрыс болар еді. Ал Ақсуат мектебіне осы қасиетті шаңырақта қырық жыл тер төгіп, сан шәкіртке білім нұрын шашқан Қабдрахман Оразалиннің есімі лайық болар еді.
Ауысып кеткен екі атау деуіміздің мәнісі осы. Біздікі — пікір ғана. Ал түбегейлі шешімді құдайдан бір жас кіші халық өзі айтады.
Мейрам ОРАЛОВ,
ардагер журналист,
Ақсуат ауылы
