Абай облысының полицейлері кәмелетке толмағандардың қауіпсіздігін қамтамасыз ету және құқық бұзушылықтардың алдын алу мақсатында түнгі профилактикалық іс-шара өткізді.
Рейд барысында тәртіп сақшылары ойын-сауық орындарын және жасөспірімдер көп жиналатын жерлерді тексерді. Заңнамаға сәйкес, кәмелетке толмағандардың заңды өкілдерінің ілесуінсіз сағат 22:00-ден кейін ойын-сауық мекемелерінде, ал 23:00-ден кейін көшеде жүруіне тыйым салынады.
Іс-шара нәтижесінде кәмелетке толмағандардың түнгі уақытта ойын-сауық орындарында немесе тұрғын үйден тыс жерлерде заңды өкілдерінің ілесуінсіз жүрген 8 фактісі анықталды. Бұл заңбұзушылықтар сағат 23:00-ден кейін көшелерде және сағат 22:00-ден кейін ойын-сауық орындарында тіркелді. Сонымен қатар, түнгі уақытта тыныштық пен қоғамдық тәртіпті бұзған 2 дерек, жасөспірімдердің қоғамдық орындарда алкогольдік ішімдік ішіп, мас күйде жүрген 2 жағдайы анықталды. Аталған жасөспірімдер полиция бөліміне жеткізіліп, ата-аналарына хабар берілді.
Бұдан бөлек, екі кәмелетке толмаған жасөспірім Кәмелетке толмағандарды бейімдеу орталығына орналастырылды.
Абай облысының полициясы бұл шаралар кәмелетке толмағандардың құқықтары мен заңды мүдделерін қорғауға, сондай-ақ олардың қатысуымен жасалатын құқық бұзушылықтардың алдын алуға бағытталғанын еске салады. Ата-аналарға балалардың бос уақытын қадағалап, олардың түнгі уақытта жүрген жерлеріне назар аудару қажеттігі қатаң ескертіледі.
