Semeytany.kz – Бүгін Абай облысының әкімі Берік Уәлидің төрағалығымен өткен кеңейтілген аппараттық жиында 2025–2026 оқу жылына дайындық барысы және «Қарызсыз қоғам 2» жобасының жүзеге асырылуы талқыланды. Отырысқа облыстық басқармалар, өңірлік департаменттер басшылары мен аудан, қала әкімдері онлайн қосылды.
Білім басқармасының басшысы Бауыржан Төленов өңірдегі 758 білім ұйымында 166 мыңнан астам баланың оқитынын, жаңа оқу жылында 1-сыныпқа 10 155 оқушы қабылданатынын мәлімдеді. 2023–2029 жылдарға арналған білімді дамыту жол картасы аясында үш апатты мектептің құрылыс жұмыстары басталды, «Келешек мектептері» жобасымен 1500 орындық екі мектеп пайдалануға берілді, жыл соңына дейін тағы екі мектеп ашылады. Семейде қосымша 1000 орындық ғимарат салынып жатыр, 300 орындық жаңа мектептің құрылысы да қолға алынады.
Мектепке дейінгі білім беру саласында 365 балабақшада 25 мыңнан астам бала тәрбиеленуде: 3–6 жастағыларды қамту – 100%, 2–6 жас – 90,9%. Кезекте 5,8 мың бала бар. Биыл жекеменшік сектор есебінен 2470 жаңа орын ашылып, Мақаншыда 140 орындық балабақша іске қосылды. Оқушылардың бос уақытын тиімді өткізу үшін жыл соңына дейін Оқушылар сарайы мен Қарашоқы шатқалындағы лагерь ашылмақ.
Техникалық және кәсіптік білім беру жүйесінде 33 колледжде 21 139 студент оқиды, 159 мамандық пен 294 біліктілік бойынша сабақ беріледі. «Жұмысшы мамандықтар жылы» аясында 43 мамандандырылған сынып ашылды. Кадрлық құрамды нығайту үшін «1000 көшбасшы» жобасы жүріп жатыр: осы бастама бойынша 22 мектепке жаңа директорлар тағайындалады. Әлеуметтік қолдау бағытында «Мектепке жол» акциясымен 1555 балаға материалдық, 52 балаға қаржылай көмек көрсетілді.
Аймақ басшысы білім нысандарын жаңа оқу жылына толық дайындауды тапсырды: жөндеу жұмыстарын 25 тамызға дейін аяқтау, қажет болса үш ауысымды қарастыру, жылыту маусымына сақадай сай болу, мектеп маңындағы жол қауіпсіздігін және білім ошақтарындағы қауіпсіздік жүйелерін күшейту. Сонымен бірге 1 қыркүйектен бастап жол ережелері бойынша рейдтер ұйымдастыру, буллингтің алдын алу түсіндіру жұмыстарын жандандыру жүктелді. «Водныйдағы жаңа мектепке асфальт жабындысы төселіп, жол салынуы керек. Барлық мәселе менің жеке бақылауымда», – деді Берік Уәли.
