Көкпекті
Биылғы жаздың басында «Таза Қазақстан» экологиялық акциясы аясында ауылдарды абаттандыру, көгалдандыру және тұрғындар арасында экологиялық мәдениетті қалыптастыру мақсатында «Үлгілі ауыл» байқауы жарияланған болатын.
Маусым айында аудан әкімі Әділет Қожанбаевтың өкімімен байқаудың ережесі бекіліп, жеңімпаздарды анықтау үшін арнайы жұмыс тобы құрылды. Ауылдардың санитарлық жағдайы, абаттандыру, көгалдандыру жұмыстары — көшеттер отырғызу және олардың күтімі; мекемелер, дүкендер, тұрғын үйлер мен қоршаулардың көрінісі, түнгі жарықтандыру деңгейі; жолдардың сапасы мен көше тазалығы; шағын архитектуралық нысандар мен демалыс алаңдарының жай-күйі; қоқыс полигондары мен тұрмыстық қалдықтарды шығару тәртібі; көше бойындағы бағаналар мен үгіт-насихат материалдарының реттелуі бойынша сынға түскен байқау қорытындысы бойынша Теректі ауылдық округі үздік шығып, бірінші орынды иеленді.
Жұмыс тобы барлық ауылдық округтерге арнайы сапарлар ұйымдастырып, үздіктерді анықтаған еді. Өткен аптада аудандық ішкі саясат бөлімінің басшысы Азат Қайратұлы бастаған жұмыс тобы байқау қорытындысын жариялап, үздік ауылдар салтанатты түрде марапатталды.
«Үлгілі ауыл» атанған Теректі ауылдық округіне 20 млн теңгенің сертификаты табысталды. Екінші орынды Тассай ауылдық округі жеңіп алып, 10 млн теңге, үшінші орынды Қойгелді Аухадиев атындағы ауылдық округ иеленіп, 5 млн теңге қаржылай сыйлықпен марапатталды.
Айта кету керек, биылғы байқауға Көкпекті ауылдық округі қатыстырылған жоқ.
Бұл байқау ауылдар арасындағы салауатты бәсекелестікті арттырып қана қоймай, жергілікті тұрғындардың туған жеріне деген сүйіспеншілігін, жауапкершілігін нығайтуды көздейді. Аудан әкімі Әділет Қожанбаевтың айтуынша, байқау алдағы жылдары да жалғасын табады. Келесі жылы «Үлгілі көше», «Үлгілі аула» және «Үлгілі мекеме» сияқты аталымдар қосылып, байқаудың ауқымы кеңейетін болады.
