Өңіріміздегі көрікті жерлердің бірі Шүлбі су қоймасының жағалауына жыл сайын жаз мезгілінде демалушылар көп келеді. Алайда табиғат аясында тынығуға келген тұрғындардың барлығы бірдей тазалықты сақтай бермейді. Соның салдарынан аймақтың экологиялық жағдайына зиян келіп отыр.
Жуырда «Семей орманы» мекемесінің қызметкерлері, еріктілер және «Жасыл ел» жастар жасағы «Таза Қазақстан» акциясы аясында Шүлбі су қоймасының жағалауында кезекті рет тазалық шарасын өткізді. Сенбіліктің нәтижесінде жағалаудағы тұрмыстық қалдық жиналып, арнайы полигондарға жеткізілді.
– «Таза Қазақстан» – өте ауқымды акция. «Семей орманы» мекемесінің жұмысшылары, Бородулиха ауданының еріктілері акцияға жаз бойы белсенді түрде қатысуда. Ауқымды шараға 100-ге жуық адам қатысты. Сенбіліктердің нәтижесінде Шүлбі жағалауы 10 тонна қоқыстан тазартылды. Жағалауды қоқысқа толтыратын — адамдар, өзіміз. Табиғат бәрімізге ортақ, оны қорғау – әрбір азаматтың парызы, – дейді «Семей орманы» табиғы резерватының бөлім басшысы Кәусар Рамазанов.
Шүлбі су қоймасының оң жағалауы — жасыл желекпен көмкерілген, табиғаты көркем аумақ. Сенбі-жексенбі күндері мұнда адам өте көп болады, суға шомылып, демалып қайтады. Алайда табиғатқа деген жауапсыздық ең үлкен мәселе болып тұр. Жерлестеріміз өзі тастаған қоқысты жинап кетуге де ерінеді. Жағалауда пластик бөтелкелер, пакеттер, тағам қалдықтары үйіліп жатады.
Ұйымдастырушылардың айтуынша, тазалық жұмыстары аптасына бір рет тұрақты түрде жүргізіледі. Бірақ мәселе мұнымен шешілмейді. Табиғатқа деген жанашырлық болмаса, экологияны сақтай алмайтынымызды жете түсіне бермейтініміз өкінішті. «Таза Қазақстан» бағдарламасының басты мақсаты да сол – әрбір адамның экологиялық мәдениеті мен табиғатқа деген жауапкершілігін қалыптастыру, қоршаған ортаны сақтау. Бұл – ұрпақ алдындағы үлкен жауапкершілік.
Табиғат – адамзаттың өмір сүретін ортасы. Ал оны таза ұстау — әрқайсымыздың міндетіміз.
Өз тілшіміз
