Semeytany.kz — Елімізде әскерге шақыру науқаны толық цифрланып, қағаз түріндегі повесткалар жойылады. Бұл туралы Өңірлік коммуникациялар қызметіндегі брифингте Абай облысы Қорғаныс істері департаментінің басшысы Руслан Омаров мәлімдеді. Енді шақыру туралы хабарламалар азаматтарға SMS арқылы немесе eGov порталындағы жеке кабинетке келеді. Хабарламаға мән бермеген жағдайда мәселе Әкімшілік құқық бұзушылық туралы кодекс аясында қаралады.
Департамент басшысы «бұрынғыдай жергілікті әскери басқармаға барып, құжат өткізу қажет емес, бұл өзгеріс ашықтықты арттырып, халыққа қолайлы жағдай жасайды» деді.
Жаңа заң әлеуметтік жеңілдіктерді де қамтиды: борышын өтегендер ҰБТ нәтижесіне қарамастан ақылы негізде ЖОО-ға түсе алады, колледж квоталарына қатысады, «Сарбаз 2.0» ақпараттық жүйесі арқылы тегін грант иегері болу мүмкіндігі бар. Сондай-ақ сарбаздар конкурстан тыс жоғары оқу орындарының әскери кафедраларына қабылданады.
Әскери қызметке кейінге қалдырудан бас тартқан студенттер грантынан айырылмай, академиялық кезеңде оқуын жалғастыра алады. Заң 2025 жылғы 16 қыркүйектен бастап күшіне енеді.
