Semeytany.kz — Семейде «Азаматтардың конституциялық құқықтарын қорғау» атты халықаралық ғылыми-тәжірибелік конференция өтті. Іс-шара Қазақстан Республикасы Конституциясының 30 жылдығына арналды. Жиынға Абай облысының әкімі Берік Уәли, ҚР Әділет министрі Ерлан Сәрсембаев, Конституциялық Сот төрағасының орынбасары Бақыт Нұрмұханов және Парламент Сенатының депутаты Айнұр Арғынбекова қатысты.
Аймақ басшысы Берік Уәли конференция құқықтық мәдениетті көтеріп, заң үстемдігін қамтамасыз ету жолындағы ғылыми талқылауларға серпін беретінін атап өтті. Ол Мемлекет басшысы Қасым-Жомарт Тоқаевтың Ата заңды мемлекеттіліктің берік тұғыры ретінде бағалағанын еске салып, Конституция азаматтардың құқығы мен бостандығын қорғаудың мызғымас кепілі екенін айтты. Сондай-ақ өңірдің рухани мәртебесін атап өтіп, биыл 180 жылдығы аталып өтіп жатқан ұлы Абайдың әділет, теңдік туралы ойлары қазіргі демократиялық құндылықтармен үндесетінін жеткізді.
Әділет министрі Ерлан Сәрсембаев конференцияның Абай облысында өтуі символдық мәнге ие екенін айтты. Министр «Толық адам» ілімі заңға бағынатын, құқықтық санасы жоғары тұлғаның бейнесін айқындайтынын, ал ведомство азаматтардың құқықтарын қорғау және құқықтық сауаттылықты арттыру бағытында жүйелі жұмыс жүргізіп жатқанын мәлімдеді.
Жиын барысында Өзбекстанның Заңнама және құқықтық саясат институтының профессоры Гүлчехра Маликова онлайн баяндама жасады. Еліміздің әр өңірінен келген заңгерлер, ғалымдар, профессорлар мен адвокаттар конституциялық құқықтарды қорғау, заңнаманы жетілдіру және құқықтық институттарды дамыту мәселелерін талқылады.
