Semeytany.kz — Семейдегі «Ескі көпірдің» асфальт жабыны толық жаңартылды. Нысанда атқарылған жұмыстармен облыс әкімі Берік Уәли танысты.
16 тамызда басталған жөндеу барысында ұзындығы шамамен 1 шақырым учаскедегі ескі қабат қырылып, орнына қалыңдығы 6 см тасты-мастикалық асфальт төселді. Бүгін жол таңбалары сызылып, ертеңнен бастап көпір қалалықтар үшін ашылады.
Аймақ басшысының айтуынша, бұған дейін оқушылардың жазғы каникулы кезінде аспалы көпірге асфальт төсеу аяқталған. Енді «Ескі көпірде» де қозғалыс шарттары жақсарып, жылдамдық сағатына 40 км-ден 60 км-ге дейін ұлғайтылады.
Облыс әкімі автогуж көпірі жанындағы жаңа көлік өткелінің құрылысына да тоқталды. «Орталық Азия – Қытай» саммитінен кейін ҚХР тарапынан бөлінетін қайтарымсыз грант есебінен аталған көпір құрылысына қаржы тарту ұсынысы беріліп, бастама Мемлекет басшысының қолдауын тапқан.
Қазіргі жоспарға сай, Үкімет және салалық министрліктермен келісім жасалды, қаржыландыру қарастырылды. Мердігер жыл соңына дейін жобаның бірінші кезеңін аяқтап, көлік қозғалысын ашуды көздейді, ал толық асфальттау жұмыстары көктемде жалғасады. Ескі көпір келесі жылы жаяу жүргіншілерге бейімделіп, серуен аймағы мен шағын сауда орындары бар кеңістікке айналмақ.
