Мемлекет басшысы Қасым-Жомарт Тоқаевтың бастамасымен жарияланған Жұмысшы мамандықтары жылына орай, Семей қаласындағы Достық үйінде маңызды кездесу өтті. Кездесуге еңбек арадагерлері, тәжірибелі мамандар және студент жастар қатысып, ойларын ортаға салды.
Бүгінгі таңда кез келген қалада сұранысқа ие мамандықтардың бірі тұрғын үй-коммуналдық шаруашылыққа саласына қатысты. Семейде ғимараттарды жылумен, сумен, электрмен үздіксіз қамтамасыз ететін кәсіпорындарда жүздеген адам жұмыс істейді. Одан өзге тазалау, абаттандыру және көгалдандыру, қоқыс шығару сияқты жұмыстарға адам қажеттігі байқалады. Сол себептен тұрғындары күнненкүнге артып келе жатқан қаламыздың тұрғын үй-коммуналдық шаруашылығы саласын жандандыру үнемі назарда болуға тиіс. Семейдегі Қазақстан халқы Ассамблеясы мүшелерінің «Жұмысшы мамандықтары – бүгінгі және болашақтың кәсіптері» тақырыбында жастармен кездесу ұйымдастыруы да осы мақсаттан туындаған еді. Кездесу барысында жұмысшы мамандықтары бойынша білім алып жатқан ІТ және жаңа технологиялар жоғары колледжі, Бизнес және сервис жоғары колледжі, Электротехника колледжі, Көлік колледжінің студенттері өздерінің оқу орындары туралы айтып, білікті мамандарға сауалдарын қойды. «Теплокоммунэнерго» мемлекеттік кәсіпорнының маманы Е.Леденева, «Семей – Водоканал» мекемесі қызметкері А.Муршел, «Семей Тазалық» ЖШС-нің білікті маманы В.Соловьев, тағы да басқа аға буын өкілдері өз тәжірибелерін бөлісті. – Өндірістік саладағы жұмыс орындары экономиканың іргетасы болып қала береді. Заманауи технология мен индустрияландыру қарқынды дамыған сайын олардың маңыздылығы артып келеді. Біздің мақсатымыз – жастарды болашақта өндірісітік салада жұмыс істеуге ынталандыру, – деп атап өтті Абай облыстық мәслихатының депутаты Рафаэль Хазипов. Бизнес және қызмет көрсету жоғары колледжінің студенті Жанна Байгерей барлық жұмысшы мамандықтарының сұранысқа ие екенін, көптеген кәсіпорындарға жақсы маман қажет екендігіне тоқталды. – Мен «Тігін өндірісі» мамандығы бойынша білім алып жатырмын. Негізінен, осы мамандықтағы сәнгер болуды армандаймын. Барлығымыз үшін колледжде оқу — тек оқу ғана емес, тәжірибе жинақтап, шыңдалуға ұмтылу. Мен мамандығыма сай саланы дамытуға және танымал етуге көмектесетіндердің барлығына алғыс айтқым келеді,- деді Ж.Байгерей. Электротехника колледжінің студенті Аманәлі Рамазанов еліміздің нағыз болашағын қалыптастыруда жұмысшы мамандығын таңдаған жастар үшін маңызды екендігін айтты. ҚР ҚХА мүшесі, «Жастар Ассамблеясы» қоғамдық бірлестігі Абай облыстық филиалы төрағасы Әнуар Алдынғұров та бұл бағыттағы мамандықтың болашағына сенімін білдірді. — Жұмысшы мамандықтары жылы – бұл еңбекке деген жаңа көзқарасты қалыптастыруға, өндірістік салада еңбек етіп жүрген мамандарды құрметтеуге жасалған нақты қадам деп білемін. Сондықтан студенттермен және өндіріс саласының өкілдерімен кездесу мен үшін өте пайдалы болды,- дейді Әнуар Алдынғұров. Шара соңында қатысқан қонақтарға Абай облыстық мәслихатының төрағасы Шалқар Байбектің атынан алғыс хаттар табыс етілді.
Айман ШӘРІПХАНОВА
