Semeitany.kz – Абай облысының әкімі Берік Уәли Жаңасемей ауданына жұмыс сапарымен барып, Озерки ауылындағы мектеп пен балабақшаның жай-күйін қарап, әлеуметтік нысандарды дамыту бойынша нақты тапсырмалар берді.
Озерки ауылдық округіндегі жалпы орта мектеп 1987 жылы салынған. Қазір мұнда 50 мұғалім еңбек етіп, 327 оқушы білім алады, мектепалды даярлықта 23 бала тәрбиеленеді. Өткен жылы «Қазақстан халқына» қорының қолдауымен шатыр, еден, есіктер жаңарып, жылу қазандығына үш жаңа пеш орнатылған, барлық кабинеттерге интерактивті тақталар қойылған. Дегенмен ғимаратта бірқатар түйткіл бар: мүмкіндігі шектеулі жандар үшін пандус қажет, сондай-ақ қоршау, кіреберіс және ойын алаңдарын жөндеу керек. Тұрғындар сапар барысында ауылға сапалы интернет тарту, Мәдениет үйі мен спорт кешенін салу мәселелерін көтерді.
Аймақ басшысы бұл ұсыныстар назардан тыс қалмайтынын айтып, ауылға қолдау көрсетілетінін жеткізді. Оның айтуынша, Озеркиде интернет мәселесін шешу үшін антенналық-мачталық құрылғы орнатылып жатыр, нысан келесі айда пайдалануға беріледі. Спорттық-сауықтыру кешенін салу бастамасына қолдау білдіріліп, жобалық-сметалық құжаттаманы әзірлеу тапсырылды.
Әкім «Озерки балабақшасы» ЖШС-де де болды. 1977 жылғы ғимарат 2024 жылы қайта жаңғыртылып, пайдалануға берілген. Мекемеде 15 қызметкер жұмыс істейді, 3 топта 70 бала тәрбиеленуде, балалардың танымдық қабілеттерін дамытуға арналған 4 оқу кабинеті жабдықталған. Берік Уәли балабақша жұмысын оң бағалап, мектепке дейінгі білім сапасын арттыру маңызын атап өтті. Аудан әкіміне ойын алаңдарын салу үшін аумақты кеңейту бойынша тапсырма берілді.
