Semeytany.kz — 25 тамыз күні өңірдің бірнеше ауданында «Таза Қазақстан» экологиялық бағдарламасы аясында кең көлемді акциялар өтіп, жастар, қоғам белсенділері мен мәдениет саласы қызметкерлері бірлесе тазалық жұмыстарын жүргізді.
Абай ауданында мекеме қызметкерлері, ауыл тұрғындары және жастар Қарауыл ауылындағы Қарауыл төбе мен оған іргелес аумақты, сондай-ақ ауылдық округтердің көшелерін ретке келтірді. Шамамен 400 адам қатысып, 13 арнайы техника жұмылдырылды, 75 тоннаға жуық қоқыс шығарылды. Белсенді Ерзат Қайратұлы «табиғатқа жанашырлық пен ортақ жауапкершілікті күшейтетін мұндай шараларға әрдайым дайынбыз» екенін айтты.
Аягөз ауданында «Саябақтар шеруі» акциясына 50-ден астам жас қатысып, «Құттыбай би», «Абай», «Алтын адам», «Қозы Көрпеш – Баян сұлу», «Ардагерлер» саябақтарын тазалады. Нәтижесінде 3,9 гектар аумақ қамтылып, 150-ден астам қап қоқыс жиналды. Аудандық мәслихат депутаты Айдар Нәдірбай «тазалық әр адамнан басталатынын» айтып, тұрғындарды тұрақты түрде қатысуға шақырды.
Сол күні Мақаншы ауданындағы Алакөл жағалауында да жеті ұйым мен мекеме өкілдерін қоса алғанда 150 адам сенбілікке шықты. Екі техника тартылып, 7,5 тонна тұрмыстық қатты қалдық полигондарға жеткізілді.
Жалпы алғанда, аталған акциялар нәтижесінде өңірде кемінде 82,5 тонна қоқыс шығарылды. Жергілікті билік пен белсенділер мұндай шаралар жалғасын табатынын, қоғамдық орындардағы тәртіп пен тазалықты сақтау ортақ жауапкершілік екенін атап өтті.
