Семей қаласында өткен 7 ай ішінде ішек инфекциялары бойынша 287 жағдай тіркелген. Осыған байланысты қалада профилактикалық түсіндіру жұмыстары белсенді түрде жүргізілуде. Бұл туралы Өңірлік коммуникациялар қызметі алаңында Семей қалалық санитариялық-эпидемиологиялық бақылау басқармасының басшысы Шыңғыс Чокушев пен басқарманың жетекші маманы Дана Төлендінің қатысуымен өткен баспасөз мәслихатында айтылды.
— Біздің басты міндетіміз — халыққа ұсынылатын азық-түлік өнімдерінің сапасы мен қауіпсіздігін қамтамасыз ету, сондай-ақ жұқпалы аурулардың алдын алу. Осыған байланысты профилактикалық түсіндіру жұмыстары белсенді түрде жүргізілуде. Құс өнімдерін, жартылай дайын тағамдарды және кремді кондитерлік өнімдерді өндіруші мекемелер мамандарына арналған 3 семинар, сондай-ақ базарларда 6 акция ұйымдастырылып, «Тамақтан уланудың алдын алу», «Әр үйге — сапалы тамақ өнімдері» тақырыптарында ақпараттық түсіндіру жұмыстары жүргізілді. Сонымен қатар сауда орындарында 400-ден аса жаднама таратылып, өнімдердің сапасы зертханалық тексерулерден өткізілді,- деді Шыңғыс Чокушев.
Мамандардың айтуынша, қаладағы білім беру ұйымдарының асханалары мен қоғамдық тамақтану нысандарына қатаң бақылау орнатылған. Мектептер мен балабақшалардың асханаларында топтық улану фактілері тіркелмеген. Дегенмен жаз мезгілінде тамақтан улану деректері жиілейтіні белгілі. Бұған ауа температурасының жоғарылауы, микроорганизмдердің тез көбеюі және бақша дақылдарының пісіп-жетілу кезеңі әсер етеді. Көкөніс пен жемістерді жумай немесе тағамды өңдеусіз пайдалану балалар мен ересектер арасында инфекцияның көбеюіне әкеледі.
Басқарма тарапынан көше саудасына да тұрақты бақылау жүргізіліп келеді. Мамандар жабайы сауда орындарынан өнім сатып алу да денсаулыққа қауіп төндіретінін ескертеді. Әсіресе көше бойындағы, аялдамалар жанындағы және ғимараттар маңында ұйымдастырылған жайма саудадағы өнімдердің санитарлық жағдайы тексерілмейді әрі тез бұзылатын тағамдардың сапасына еш кепілдік жоқ.
— Тамақтан уланудың себептерінің бірі – тамақ өнімдерінің сақтау шарттарының орындалмауы. Тамақ өнімдерін сақтау қоймаларында әр түрлі тағам түрлеріне арналған арнайы температуралық және ылғалдылық режимі сақталуы қажет. Тексеру барысында кейбір тағамдардың сақтау шарттары талапқа сай еместігі анықталды. Бұл тағам арқылы жұғатын аурулардың негізгі көзі болып табылады, — деді басқарманың жетекші маманы Дана Төленді.
Мамандар тұрғындарға азық-түлік сатып аларда бірнеше маңызды кеңес ұсынады: өнімнің сыртқы түрі мен иісіне назар аударыңыз; сатушыдан сапа сертификатын немесе басқа да құжаттарды талап етіңіз; сүт, ет, жеміс-жидек пен көкөністерді тек рұқсат етілген орындардан алыңыз; тағамның тоңазытқышта сақталғанына көз жеткізіңіз.
Әйгерім ҚАЛИАҚПАР
